Ka tnat Mining and Geology ka jylla ka la btah ia u Deputy Commissioner, South West Khasi Hills ban pynlong ia ka jingtohkit halor ka jingtih dewiong be-ain ha South West Khasi Hills District kaba hap hapoh Nonghyllam Police Station da u bah Skingford Nongbri bad u dei ban phah ia ka kaiphot hapoh 7 sngi sha u Justice (Retd) BP Katakey katkum ka jingkwah jong u.
U Secretary ka tnat Mining & Geology, u RP Marak ula iathuh ka tnat ka la pynmih ia ka hukum ha ka 21 tarik mynta u bnai ba u dei ban shimkhia ban leh eiei pyrshah ia utei u briew katkum ki kyndon jong ka MMDR Act, 1957 lada lap ba u donkti shisha ban tih dewiong be-ain. Ia u Deputy Commissioner, South West Khasi Hills District un iarap ban synran da u Superintendent of Police, South West Khasi Hills District ban pynlong ia ka jingtohkit.
Kum ban pynpaw ka NGT ka la pynbna ban khang tih dewiong ha Meghalaya ha u snem 2014, hynrei ki dang don ki nongtih dewiong be-ain haduh mynta, kata hadien 10 ba la khang ka NGT.
