Ka jingiakynad ka la bthei biang ha Manipur ha kaba ki paidbah ki la thombor bad pynjulor ia ki iing jong ki MLA ha Imphal, na ka jingjia shah pyniap hynriew ngut kiba shah rahbor ha Jiribam. Ka sorkar ka la pynjari korphiw ha Imphal West bad Imphal East kaba la ktah na ki kam thombor bad la khang ki kor ki bor internet ha ki hynriew tylli ki district namar ba ki jingiakhih ba thymmai ki la mih ha ki District jong ka Valley pyrshah ia ka jingshah pyniap ki 6 ngut ki briew ha Jiribam hadien ba ki la shah rahbor ha ki lehnoh. Ha kajuh ka por, ka Ministry of Home Affairs ka sorkar pdeng hynne ka sngi ka la btah ïa baroh ki bor pahara ha ka jylla ban shim ïa ki lad ki lynti ban wanrah biang ïa ka shongsuk shongsaiñ ha Jylla Manipur. Ka jinglong jingman ha jylla Manipur ka don hapdeng ka saw ka sian haduh mynta bad ki kynhun kieng atiar na baroh ar ki jaidbynriew ba don ha ka jingïakynad ki la pynleit jingmut ha ki kam thombor kaba la wanrah ïa ka jingduhnong bad pynthut ïa ka shongsuk shongsaiñ.
Ka tnad kam pohiing ka la sdang da ki kyndon kiba tyngeh pyrshah ïa kino kino kiba pyrshangia ki kam thombor bad la kyrpad ia ki paidbah ban pynneh ia ka jingsuk, ban ym ngeit ia ki khubor lamler bad ban iatreilang bad ki bor pahara ban pynneh ia ka suk ka sain ha ka Jylla. Ha ka sngi Palei ka sorkar pdeng ka la pyntreikam biang ïa ka aiñ shipai (Special Powers) Act ha ki hynriew tylli pulit station ka Manipur, kynthup ïa ka Jiribam kaba la shah ktah ha ki kam thombor. Ia kane ka hukum ba khatduh la pynmih hadien ba ka sorkar Manipur ka la pynjari ia ka AFSPA ha baroh kawei ka jylla ha ka 1 tarik u Risaw ha ki 19 tylli ki pulit station kynthup ia kitei ki hynriew tylli.
Ki Police Station ba la weng ia kane ka hukum ka sorkar Manipur ha ka 1 tarik Risaw ki long ka Imphal, Lamphal, City, Singjamei, Sekmai, Lamsang, Patsoi, Wangoi, Porompat, Heingang, Lamlai, Irilbung, Leimakhong, Jihoubal, Bishnupur, Nambol, Moibaching, Kak. Kum ban pynpaw ka jingiakynad ha Manipur ka la sdang naduh bnai Jymmang 2023, bad palat 200 ngut ki briew ki la shah pyniap bad da ki hajar ngut ki la sah khlem ïing khlem sem ha ka jingïakynad hapdeng ki Meitei kiba shong ha Imphal Valley bad ki kynhun Kuki-Zo kiba shong ha ki lum ba marjan.
