Nongstoin, Jylliew: Watla ka sorkar lyngba ka jingbei tyngka jong ka World Bank ka la sdang ban pyntrei ia ka surok Nongstoin-Maweit kaba dei ka surok kaba la shah ieh beiñ baroh shi katta, hynrei wat hapdeng ka jingpyntrei ia katei ka surok, ki paidbah ki la syrtok bad kordit khait ban iaid ban ieng namar mynta wat ki Sumo kiba ju kamai sha katei ka jaka ki la jngan ban leit, namar ka jingktieh bad jingshong um hapdeng surok.
La ong ba ka Bus ba ju kamai ha katei ka thaiñ mynta ka la sangeh syndon ban leit kamai namar kam nud shuh ban tur ia katei ka surok kaba la dap da ka ahor ktieh suda. Nalor kane la ong ba ka jingkieng ha Wahlyngdoh ruh ka la buh jingma ia ki kali ban iaid lyngba namar ka jingsdang twa jong ka kynroh bad ka jingkhyllem ka khyndew.
Haba sngewkhia halor kane ka jingeh ba ki paidbah ki iakynduh, na ka liang ka HYC Maweit Circle hapoh ka jingialam jong u Bah Jeremi-ia Dkhar ki la leit ban jurip ia katei ka surok bad ki la dawa ruh na ki arngut ki Contractor kiba pyntrei ia katei ka surok ba kim dei ban buh ia ki paidbah ha ka jingeh bad ba ki dei ban maramot bad pynbha noh mardor ia kito ki jaka kiba la sniew palat khnang ban lait na kino kino ki jingjia bym sngewtynnad.
