U Vice President ka Ri u Jagdeep Dhankhar hynne ka sngi u la buh ia u mawnongrim ban tei ia ka All Faith Prayer Hall bad ka Public Reception Park ha Rajbhavan, Shillong bad ula thung ruh ia u dieng ha katei ka jaka. Ha ka por mynstep u Vice President ryngkat bad ka kurim jongu ka Dr Sudesh Dhankhar, kila iashimbynta ha ka jingthung dieng bad kila iathung mar uwei u dieng kum shibynta jong ka “Ek Ped Ma Ke Naam” campaign naka bynta ban iada ia ka mariang bad ban pynneh pynsah ia ki dieng ki siej hapoh ka ri.
Hadien kane, u Vice President ula buh mawnongrim ruh ban tei ia ka All Faith Prayer Hall ne ka jaka duwai ia baroh ki jait niam, Public Reception Park bad ka Rain Water Harvesting Pond, ka Conference Hall, Public Utility bad ka Creche ha Raj Bhavan.
Kine ki sienjam ba la shim hapoh ka jingialam jong u Lat ka Jylla CH Vijayashankhar ka pyni ia ka jingshimkhia jong ka Raj Bhavan, ban sumar ia ka mariang, ban ai ka jingshakri ia ka imlang sahlang bad ban thaw ia ki jaka ba kynthup lang ia ki paidbah.
