U MLA ka Congress u bah Ronnie V Lyngdoh ula kyntu ia ka sorkar ba ka dei ban buh da ki jingthoh da ki Sign Board ia ki kyrteng jong ki surok ha ka jylla ba la ai nam ha ka kyrteng jong ki riewkhraw. U bah Ronnie haba wanrah ia kane ka mat ha ka kynta kylli jingkylli, u la ong ba ki don bun ki paidbah ki bym tip ia ka kyrteng jong ki surok ba la ai nam da ka kyrteng jong ki riewkhraw bad bun ki dang pyndonkam da kijuh ki kyrteng ba mynshwa. Ula kyntu ba dei ban wah ban pynieng da ki Sign board ha ki surok bad u la ai nuksa ba don ki jaka ba haduh mynta ki dang khot da kajuh ka kyrteng jaka.
Halor kane, na ka liang jong u Myntri badei khmih u Rakkam A Sangma ula pyntip ba ki don bun ki surok kiba la jer da ka kyrteng jong ki riewkhraw kum ka Mahatma Gandhi Road, u Tirot Sing Syiem Road, Don Bosco Road, Rev Nichols Roy Road, Soso Tham Road, U Kiang Nangbah Road, Pa Togan Sangma Road bad Mother Teresa Road, Malvis Dunn Mawlong Road, Martin N Majaw Road, Thranghok Road, Archbishop Road bad Dr Hugh Gordon Robert Road.
Ha kajuh ka por na ka liang u Myntri ula ong ba kan shimkhia ia kane bad ia halor kane ka sorkar ka la ladep iakren bad ka tnad PWD bad ka Shillong Municipal Board ba kin leh ia kaba donkam. Ha kajuh ka por u Myntri u la kubur ban pynbeit ia ki jingbakla haba iadei bad ki kyrteng bad pyntikna ba kin buh da ki Sign Board pyntip lyngba ki sign board.
