Ka Department of Paediatrics jong ka NEIGRIHMS hynnin ka sngi, ka la pynlong ia ka East Zone Pediatric Nephrology Conference 2024 ha NEIGRIHMS halor ka thong ban ai ka jingshakri katkum kane ka juk stad ba mynta ia ki nongpang. La pynlong ia katei ka prokram hapoh ka jingïalam jongu Dr. Himesh Barman, Professor bad u Head jongka Department ryngkat bad ka kynhun jongu kaba kynthup ïa ka Dr. Rosina Ksoo, Associate Professor bad ka Dr. Mampy Das, Assistant Professor, ha kaba kila wanrah ha kawei ka rynsan ia bun ngut ki riewstad bad ki riewshemphang kiba la ai jingkren bad ka jingbatai kaba bniah halor ka jingpang Nephrotic Syndrome, Glomerulonephritis bad Urinary Tract Infections (UTI).
U Prof. (Dr) C. Daniala, Medical Superintendent ka NEIGRIHMS, haba ai jingkren ha ka jingplie ia ka jingialang, ula banjur ïa ka jingdonkam kyrkieh ïa ka Pediatric Nephrology Unit kaba kyrpang ha katei ka jaka sumar, da ka jingiohi jngai ban sdang noh ïa ka DM Residency Program ha ka Pediatric Nephrology ha ki snem 2019, kaba pyni ia ka jingtreishitom jongka NEIGRIHMS ban pyniar ia ka jinghikai bad jingai jingsumar ha ka thaiñ.
Katba u Dr. Anil Vasudevan na ka St. John’s Medical College, Bangalore bad Dr. Valentine Lobo na KEM Hospital, Pune, kila ai ka jingbatai kaba bniah, halor ka jingkylla ka por, kynthup ia ki Medical Genetics bad halor ki jinglap kiba thymmai bad ka jingtreikam ka jongki ha ka rukom ai jingsumar. Ki nongïashim bynta ki kynthup ruh ïa ki nonghikai jongka Pediatric Nephrology na ki jylla bapher bapher jong ka Ri India Mihngi, kum na ka West Bengal, Meghalaya, Assam, Orissa, Bihar, Jharkhand, Mizoram, bad Arunachal Pradesh ha kaba kila iashim bynta ha ka jingiakob kyntip, ka jingai ia ki jingthoh bad kiwei kiwei.
