Buh thong ka sokar ban pyndep 17 tylli ki Project Smart City mynta u snem

U Symbud Myntri Rangbah ka jylla u Bah Sniawbhalang Dhar ula ong, ka jingpyntrei ia ki projek bapher lyngba ka Smart City Project ki la iaid shakhmat bad la buh thong ia kine ki projek baroh dei ban pyndep mynta u snem. Haba iakren bad u Bah Sniawbhalang ula ong, dang shen ula pynlong iaka jingialang ban iatai sani halor ka jingpyntreikam ia ka Smart City Project bad la bthah ia baroh ki jingtei dei ban pyndep hapoh mynta u snem.

 Ula ong, kumba long mynta ki kam ki la iaid shakhmat ka jingpyntrei ia ki projek bapher bad ki don ruh ki projek kiba la jan dep ka jingtrei.  U Synbud Myntri Rangbah ula iathuh ki don 17 tylli projek ba la pyntrei lyngba ka Smart City Project.

 Ha kaba iadei bad ka jingslem palat ban shna pyndep ia ka Smart Road ha Lachumiere, u Bah Sniawbhalang ula ong, ba ka jingslem ban shna ia kane ka surok ka dei namar ka jingmih katto katne ki jingeh na ka jingkhim palat ka jaka bad hap ban pynkynriah ia ki pipe. Ula iathuh, ha ka taiew ban wan un sa khot jingialang ban pynbeit ia kane ka jingeh hapdeng ka tnad PWD bad ka Urban Affairs ba dei thik tang ka jingshna ia ka Smart Road bad la pynsangeh noh ia ka jingthmu ban shna ia ki Smart Road ha ka Wat ka Baar.