Buh thong ka sorkar ban pynkhuid shnong man ka lai bnai: Conrad

U Myntri Rangbah ka Jylla, u Conrad K Sangma, u la pynlait paidbah bad ban aiti ia ki auto rickshaw kit nuit kiba iaid da ka bording ilektrik kumba 207 tylli sha ki Block bapher bapher jong ka Ri Lum Khasi Jaintia, ia kine ki auto kit nuit la aiti sha ki nongmihkhmat na ki Block ha ka jingialang kaba la long ha ka madan ialehkai jong ka Kurkalang, ha Lumdaitkhla Bhoirymbong. Ha kane ka sngi, la ia donlang ruh u Symbut Myntri Rangbah u Bah Sniawbhalang Dhar, u Myntri ka tnad PHE u Marcuise N Marak, ka Myntri ka tnad ka Koit ka Khiah ka Dr. Mazel Ampareen Lyngdoh, u MLA ka Umroi Konstituensi u Bah Damanbait Lamare, u MDC ka Umroi Bah R. Kharbuki, ki ophisar na ka tnad PHE bad ki nongtrei ka Swachh Bharat Mission (Grameen), Meghalaya. Haba kren ha kane ka sngi, u Conrad K Sangma nyngkong eh u la pynpaw ia ka jingkmen ba kum ka jylla ka la nangjam shaphrang ban pynurlong ia ka jingangnud jong ka sorkar pdeng ban pynlong kum kawei na ki jylla kaba khuid kaba suba hapoh ka ri India ha kaba ki shnong ki thaw ki la don lut ia la ki painkhana lyngba ka Swachh Bharat Mission (Grameen).

U la iathuh ruh, ba ka jylla Meghalaya mynta ka la kot sha ka 84.33 percent na ka 10 percent ha ka kyrdan ODF plus na ka jingtrei shitom bad ban pynurlong da ki tnad treikam sorkar ka jylla Meghalaya ha ka jingiatreilang ruh ki dorbar shnong bad ki Block bapher bapher ha kaba ka thong ka long ruh, ban kot kum ka jylla na ki 10 tylli ki jylla hapoh ka ri India bad lyngba kine ki kali kit niut ilektrik ki dei ki nuksa ban nang wanrah shuh ia ka khuid ka suba hapoh kane ka jylla,  shen yn sa pynlait ia kine ki kali ha ri Lum Garo Hills. U Conrad K Sangma, u la pynbna ruh ba ka sorkar jylla mynta ka la don ia ka thong ban pynlong shisien man ka lai bnai (quarterly) ban pynlong ia ka jingpynkhuid ia ki shnong ki thaw ryngkat ka jingiatreilang bad ka ophis u DC bad kiwei kiwei ki tnat treikam ha kaba ki nongshong shnong kin mih ryntih ban pynkhuid ia ki shnong ki thaw bad yn sdang shwa haman ki District Headquarter jong ka jylla Meghalaya.

Na ka liang u Myntri ka PHE, u Marcuise N Marak, haba kren paidbah u la iathuh, ba ka sorkar jylla kan pynmih ia ka jingmang pisa na ka bynta u snem 2024-25 ba kynthup ia ka jingkynjoh ia ka 100% ODF plus, da kaba pynshna ia ki painkhana ia ki 1,10,240 tylli ki Longiing lem bad 1553 kiba ioh ia ka skhim PMAY, ban shna ia 570 tylli ki Community Sanitary Complex Unit, ban buh ia ka Plastic Waste Management Unit ha kylleng ka Jylla bad kiwei kiwei.