Ka Seng Congress hapoh ka Jylla ka la don lypa kumba 24 ngut ki kyrtong ki ban iakhun ia ka ilekshon MDC hapoh ka Khasi Hill Autonomous District Council (KHADC). Ïa kane la pyntip da u President ka Meghalaya Pradesh Congress Committee (MPCC) Bah Vincent H Pala haba kren sha ki lad pathai khubor hadien ka jingwan iasoh ki nongialam na kiwei ki seng sain pyrthei. Ha shuwa kane, ka MPCC ka la pdiang sngewbha ïa u Gerrald Shullai, u dkhot barim ka UDP bad ka kynhun jong u, u Avner Pariat uba iakhun ia ka ilekshon MLA 2023 na ka VPP na East Shillong bad kiwei kiwei de. Haba kren sha ki lad pathai khubor u President ka MPCC u Bah Pala u la ong ba ka Congress kam don jingeh satia ban ioh kyrtong ban iakhun ia ka ilekshon MDC ha Ri-lum Khasi bad Jaintia namar ka jingwan pyniasoh ki briew sha ka party ka la nang bun katba nang iaid ki sngi.“Da ka jingwan jong ka ilekshon District Council, kiba bun ki briew ki la long kiba la khreh ban iakhun na ka Congress” la ong u Bah Pala.
U bynrap bun ki kynhun na Nongthymmai constituency, khamtam na ka Trinamool Congress (TMC) bad kiwei na Umroi, Ri-Bhoi, kin sa wan pyniasoh sha ka party hadien ka elekshon shiteng samoi ha Gambegre. Haba pynpaw ba kam don jingkyrduh kyrtong da ka jingwan iasoh bun ki briew sha ka party, une u Nongialam ka Congress ula ong “Ngi la ioh kyrteng ha 25 na ki 29 tylli ki constituency ha KHADC. Sa 4-5 seat ngi dang donkam ban ioh kyrtong bad ngim don jingeh satia ban ioh kyrteng”. “Ki don katto katne ki jaka, ngi don palat ia uwei u kyrtong bad katto katne pat kiba palat ia ar ngut ki kyrtong” ula bynrap.
Haba kylli, u Bah Pala ula ong ba da ki hajar ngut ki nongkyrshan ka TMC bad NPP ki la wan ban iasoh sha ka Congress. U la pynpaw ruh ba bun ki MLA barim, MDC barim bad ki Chairman barim ki ADC ki la wan ban pyniasoh sha ka Congress ha Ri-lum Garo. Hadien ka elekshon shiteng samoi, ngin sa pdiang noh ia ki sha ka seng.
