Haba kren ha ka jingialang ai ti ki ar tylli ki kali kit mar rep na ka bynta ka Mawshynrut bad Rambrai-Jyrngam, u MLA ka Mawshynrut Constituency u Bah Methodios Dkhar u la pynpaw ba bun ki scheme na ka sorkar kim poi sha ki briew ba dei hok ban ioh namar ba duna ki lad ai jingtip. U la pynpaw ba ka jingpyllait paidbah ia kine ki kali ka dei ruh shi bynta ban ai jingtip ia ki paidbah halor ki scheme sorkar bapher bapher. U la kyntu ruh ia ki ophisar ba kin long kiba kham jynsur mynsiem na ka bynta ki paidbah bad kumjuh u la kyrpad ruh ia ki paidbah ban don ka jingia burom ba markylliang ban pyntyllun ia ki kam ha ki ophis bapher bapher.
Kitei ki artylli ki kali ki dei jong ka PRIME Agriculture Response Vehicle kiba dei hapoh ka CM elevate programme ia kaba la pynlong da ka tnad District Agriculture Officer, West Khasi Hills District hapoh Ophis Mawshynrut C&RD Block. Kum ka dak jong ka jingpyllait paidbah ïa kitei ki ar tylli ki kali, u bah Methodios Dkhar MLA ka Mawshynrut konstitwensi bad u R.G.Momin MLA ka Rambrai Jyrngam konstitwensi u la kaweh ia ka lama bad aiti ïa u shabi jong kitei ki kali sha ki arngut ki rangbah kiba dei ki nongtrei mon sngewbha na katei ka thaiñ.
Ha katei ka sngi la ïadonlang ki ophisar sorkar bapher bapher kynthup ïa ka kong P. Ïawim DAO, Nongstoiñ, u bah W.B. Marbaniang DHO Nongstoiñ, bah Reginald Kharkongor BDO ka Mawshynrut C&RD Block ba kiwei kiwei kiba na ka tnad Agriculture.Ïa katei ka jingïalang kaba lyngkot la pynïaid da ka ophis na ka tnad jong ka District Agriculture Officer West Khasi Hills District bad la pynlong ha C&RD Block Mawshynrut.
