Bun kiba phet shnong na Kyndiar sha kiwei jaka

Ka shnong Kyndiar kaba dei kawei na ka shnong hyndai kaba don ha Raid Rangnah, ka Hima Khyrim, ka dei ka shnong kaba la bun tnum iing bha ha ki snem shwa u 1950 eiei hynrei, ki briew ki la phet shnong lut noh ha u snem 1950-60 eiei, bad kynriah sha kiwei ki jaka kum sha Nongtyngur, Mawlynnong, sha Nohwet wat shaduh ka shnong Lapalang. Katkum ka jingiathuh u Sordar ka Raid Rangnah u bah Run Khonglanoh, ha kane ka shnong, la don ruh ka iing mane, hynrei la shah rah noh ha ka eriong bad mynta sah sa tang ki dak ki shin, kum u maw, bad kiwei.

U Sordar kane ka shnong u la iathuh ba  ka daw ka jingphet shnong ki briew na Kyndiar, kam dei na ka daw jong ka khlam hynrei, ka dei da kawei ka pat kaba kim pat tip thikna. “Ka jingphet shnong ki briew na Kyndiar, kam dei na ka Khlam, hynrei ka dei na kiwei ki daw, kiba ym pat thikna haduh mynta”, la ong bah Run.

U bah Run Khonglanoh, ula iathuh ba ha kane ka shnong ki don ruh ki maw, ki kynroh ba la ker ha ki nongrim iing ha katei ka jaka, bad ka lynti iaid kjat kaba shna u syiem hyndai ban poi sha Shilot, ka Bangladesh ba mynta. Hajan kane ka shnong , ki don ki maw shongthait jong u Syiem bad ka Mahadei ha katei ka jaka, kiba la oh bha jai bad pyllun kum ka bol.