Bym burom ïa ka Easter Sunday khang khyrdep ka KSU ia ki Bank

Ka Khasi Students Union, kala leit ban kang khyrdep bad ai shuti ia ki nongtrei jong ki Bank kiba la plie hynne ka sngi u Blei, kaba dei ka sngi kyrpang jong ki Khristan kaba dei ka Easter Sunday ne ka Jingmihpat u Jisu Khrist. U Information & Publicity Secretary ka KSU u samla Pynshai Rani ula pyntip ba katei ka jingleit ai shuti ia ki Bank kadei namar ka jingbym burom ïa ka Sngi Easter Sunday ha kaba kila bteng ban pynlong trei khlem da burom lem iaka jingsngew jong ki paid Hynniewtrep.

“Ki Tnat treikam bapher bapher jong ka KSU ha ka 31 tarik u Lber 2024 kala leit ban pynai shuti hi ia ki Bank bad kiwei kiwei kiba pynlong trei ha kane ka sngi kaba dei ka sngi kyntang jong ki Khun Kristan katta ka Easter Sunday kaba ju ia tip baroh” ong u samla Pynshai Rani ha ka kyrwoh khubor. Ula pyntip ba ka Seng kala lap ba jan baroh ki Bank ki pynlong trei khlem da burom ïa kane ka sngi kyrpang bad ha katei ka jingleit jurip na ka liang ka Seng kala phah khang shi syndon ïa ki bank kiba plie bad kala maham ruh ïa kitei ki Bank ba kim dei ban ïaleh pyrshah ne kheiñ dew thala ïaki sngi kyrpang jong ki Khristan.

Ka KSU kala pynpaw ba kadei ka jingleh bym suidniew ka Sorkar MDA lane NDA ia ki paid riewngeit Kristan hapoh ka jylla Meghalaya, katba ha kiwei pat ki jylla kum ka Manipur, Mizoram bad kiwei ki jylla shatei thaiñ lam mihngi ki ioh shuti ha kum kane ka sngi kyrpang watla kadei kata ka Financial Year. U nongialam ka KSU ula pyntip ba kane ka jingleit khang khyrdep ia ki Bank ka kynthup naduh Mawiong, Mawprem, Stand Jeep, Garikhana, Upper Shillong, Mawkhar, Khyndai Lad, Barik, Malki, Laitumkhrah, Nongmensong bad ha kylleng ka Bri Hynniewtrep.