U Nongialam ka Voice of the People’s Party (VPP) u Bah Ardent Miller Basaiawmoit hynne ka sngi u pynpaw ka jingbynniaw halor ka jingshah kyntait ka mat ban iakren halor ka jingkiew dor ki marbam hapoh Meghalaya. Haba kren sha ki lad pathai khubor u Bah Ardent ula iathuh ha ka jingshisha ula buh da ka Zero Hour Notice ban iakren halor ka jingkiew ki marbam hapoh Meghalaya naduh 24 tarik Nailar hynrei u Lamphang ka iingdorbar ula pynkylla ia ka Zero Hour Notice sha ka Call Attention ha kaba u Myntri ba khmih ia ka tnat Supply, u la shu buh ia ka jubab hapoh ka iing dorbar.
“Kane ka mat ka long kaba donkam bha namar ka ktah ia baroh ki nongshong shnong ka Jylla khamtam ia ki longiing ba duk” u la ong. U Bah Ardent ula pyntip ba u la tohkit halor ki dor jong ki marbam bad nujor hapdeng ka Mizoram, Assam bad Meghalaya bad la shem ka dor ki marbam ka kiew ha Meghalaya. “Ha Mizoram ka dor u Sohsaw ka long T.45 shi kilo, ha Assam T.40 bad ha Meghalaya T.50 shi kilo, Sohmynken ha Mizoram bad Assam ka long T.80, ha Meghalaya ka long T.110, u Beet ha Mizoram T.40, ha Assam T.45 ha Meghalaya T.70 shi kilo” u la ong.
U Bah Ardent ula pyntip ba ka Umphniang (Mustard Oil), ha Nagaland ka long T.155 shi liter, T.140 ha Assam hynrei T.180 ha Meghalaya, ka Umphniang (Refine) T.128 ha Nagaland, hynrei haduh T.150 ha Meghalaya. Haba iadei bad ka doh (Syiar), ha Nagaland ka long T.270 shi kilo, T.300 ha Meghalaya hynrei ha Assam ka long tang T.260, ka Doh Sniang, T.350 ha Nagaland, T.480 ha Meghalaya, T.380 ha Assam bad ka Doh Masi, ha Nagaland T.300, ha Meghalaya T.500 bad tang T.270 ha Assam. Ula ong ba ia katei ka mat un iakren shabar ka iing na bynta ka jingmyntoi ki paidbah ka jylla.
