Ha ka jingialang iamir jingmut ba ia dei bad ki aiñ ki kyndon na ka bynta ban ai jingiada ia ka mariang, ba kynthup naduh ban pynneh pynsah ia ki um ki wah, ban kiar na ka jingbret ñiut pathar, ba la pynlong da ka District legal services authority, West Jaiñtia Hills ha ka 09/11/24 ha yungwalieh Chiliangraij Jowai ryngkat ka jingiatreilang ka Meghalaya State population control board bad ka seng Khooid Yaka Wah Myntdu, u W.R. Kharkhrang Senior Environmental Engineer ka Meghalaya State Pollution Control Board, Shillong ula khot la wer iaki waheh shnong ba kin lum jingialang biang naka bynta ban iamir jingmut bad ong la dei ruh ban ai daka petition shaka JHADC khnang ba ka District Council kan kyndit bynriew noh ban don noh daka by-law lajong. Ha ka jingiadei bad ki ñiut u ong, nyngkong eh dei ka jingiatreilang ki paidbah da kaba sdang na rympei ïing ban pyniakhlad iaki ñiut ba jhieh bad bym jhieh. Bad da kaba leh kumne napdeng ki ñiut bym jhieh don ruh kiba don iaka dor.
U ong lada kwah ban ai ka lawei ba bha iaka jaitbynriew, bad ioh ruh iaka koit ka khiah dei ban sumar bha iaka mariang nalor ka khuid ka suba. Namar ba ki jaitbynriew ba duh noh iaki wah kato ka jaitbynriew ruh ka duh. Haba u phai sha ka wah Myntdu u kyntu ban kyndit bynriew noh mynta, namar ka wah Myntdu dei kaba ai jingim iaki paidbah. U pynpaw ruh ka jingbynniaw, ba bunsein ki briew ki kham kheiñ kordor iaki jaka lehniam jaka mane Blei ba shna hi da u briew kaba lah ban pynpra bad shna pynbha ha kano kano ka por, ban ia kaba shna u Blei shisien ba lah duh ym lah shuh ban ioh. Kumta u kyrpad iaki waheh shnong ban pyrshang ia kaba bha, khnang ba kin ym babe hadien da kaba ong balei nga khlem leh ha kito ki por.
Bad kane ka sngi dei ruh ka jingsdang kumta u kyrmen ba ki ryngbah shnong ryngkat ka district council kin iaid shakhmat. Ha kane ka jingialang la wan donlang ki ryngbah shnong bapher bapher, ki briew napoh ka District Legal Services Authority, u President ka seng khooid yaka wah Myntdu bad kiwei.
