Lada ka sorkar kam lah ban pynurlong ban ioh ia ka surok na Photjaud-Tynrai sha Mawbidong, ki paidbah kin pyllong ia ka jingiakhih pyrshah ia ka sorkar. Ia kane la ong u MLA ka Mawkyrwat u bah Renikton L Tongkhar haba wanrah ia ka jingkylli hapoh ka dorbar synrai ka jylla mynta ka sngi. U bah Renikton uba wanrah ia kane ka jingkylli, u la ong ba ka thain kaba hap ha Mawkyrwat konstitwensi ka don 5 tylli ki shnong bad ka donkam palat ban ioh ia ka surok kaba bha namar ba kila sah sa tang ki shynrong. “Ki paidbah ki la byrthen ban iakhih pyrshah ia ka sorkar lada ym long kam kane ka surok”, la ong u bah Renikton, bad ula kyntu ia u myntri ka tnad PWD ba, lada kam pdiang ka sorkar pdeng, ka sorkar jylla ka dei ban pyndonkam da ka pisa na ka pla ka jylla.
U symbud myntri rangbah uba peit ia ka tnad PWD u bah Prestone Tynsong uba jubab ia kane ka jingkylli, u la ong ba ia ka surok na Photjaud-Tynrai sha Mawbidong la pynrung ha ka PMGSY III. U bah Prestone u la ong ba ia ka DPR bad ki jingdonkam la pdiang ka jylla bad ka don mynta ha ka sorkar India bad mar ia dep mang pisa ka sorkar India, yn sdang noh ia ka kam.
U bah Prestone u la kyntu ia u MLA ka Mawkyrwat ba um dei ban sngew artatien namar ba ia kane ka surok ka tnad ministry Rural development ka la dep pynrung ha ka thup ba hakhmat eh bad kaba sah ka long sa tang ban ioh ia ka jingmang pisa. U symbud myntri rangbah u la ong ba ha ka PMGSY III, ka sorkar India ka la phah ban shna surok 1250 km jong u snem 2024-25 ha ka jylla. Ha ka kyndon ka PMGSY, kano kano ka shnong kaba don 250 ngut ki nongshong kin shah kynthup ban ioh surok na kane ka skhim.
