Ka shnong Mawlai Mawroh mynta ka sngi ka la lum ia ka Dorbar paidbah ban pynpaw ia ka jingpyrshah jur halor ka jingthmu ban weng noh ia ka Mawlai Mawroh na Mawlai constituency bad yn pynhap noh ha Jaiaw constituency. Ha kane ka Dorbar, la rai ba kin leit ban iakynduh ia u Chairman ka Delimitation Committee kaba la thung da ka KHADC ban kyrpad ban bishar biang ia kane bad kin ap ia ka rai na ka Executive Committee ka KHADC. Ha ka jingkren paidbah, la pynsngew ruh ba lada ki pynkynriah jubor ia ka Mawroh sha Jaiaw, ki paidbah kin nym leit shim bynta (Boycott) ban thep vote ha ka ilekshon MDC. Lah ban kdew ba dang shen ka kynhun ka Delimitation committee ka la aiti Ia ka kaiphod Sha ka EC ka KHADC bad la wanrah ruh ha iing dorbar ka Council dang shen.
Haba kren sha ki lad pathai khubor hadien ba wai ka Dorbar, u Rangbah shnong ka Mawlai Mawroh u bah Harbour Lyngdoh, ula ong ba ka jingpyrshah ka Dorbar shnong ban leit sha Jaiaw kadei namar ba ki nongshong shnong ki la ieit ban don ha Mawlai bad kim kwah ban duh ia ki skhim ba ka shnonng ka la pykhreh bad kawei na ka daw ba kongsan ka long ba kim kwah ban hap hapoh ka Shillong Municipal Board. U Rangbah shnong ka Mawroh ula ong ba watla ka Mawlai ka dei ka konstiwensi kaba bun ki nongthep vote hynrei ban shu weng jyndat ia ka Mawroh na ka Mawlai kaba dei ka khun khatduh jong ka Mawlai Town Dorbar, yn nym lah ban pdiang. Ula ai jingmut ba lada ki sngew ba ka Mawlai ka la bun briew, ki la dei ban phiah noh arliang ia ka Mawlai kata ka Mawlai ‘A’ bad ka Mawlai ‘B’.
“ Lada long kaba lah ia ka Mawlai, dei ban phiah noh sha ki ar bynta ka Mawlai ‘A’ bad ka Mawlai ‘B’. Lada ki lah ban phiah ngi kloi ban pdiang bad ngim pyrshah hynrei ban shu dkhat noh jyndat ia ka Mawroh, ngim lah sngew iahap,” ong u bah Harbour. U bah Harbour ula ong ruh ba ka Committee ha shwa ba kan ai jingmut sha ka EC na bynta ban pynwandur thymmai ia ki konstiwensi, ka Dorbar shnong kam shym la iohpdiang ia kano kano ka shithi bad ym shym la don kano kano ka jingiakren ban pynbeit halor kane, hynrei ka shnong ka shu iohi kyndit ia ka khubor na ki Social Media ban weng noh ia ka Mawroh na Mawlai bad yn pynhap noh ha Jaiaw konstiwensi. Ula ong ba katkum ka jingioh jingtip jong u, ka Mawlai Town Dorbar ka la dep ai jingmut ia ka Committee ba ym dei ban ktah ia kino kino ki shnong kiba hap hapoh ka Mawlai Town Dorbar hyrnei ki la ai jingmut ba dei ban tan noh ia ka Nongmali sha Mawlai bad ban pyllait noh ia ka Mawpat. Katkum ka jingong u Rangbah shnong, ka Mawroh ka don kumba 1162 tylli ki longiing baroh.
