Ka Hynniewtrep Youth Council (HYC) ka la ai por 7 sngi ia ka Khasi Hills Autonomous District Council (KHADC) ban khang tala ia ka karkhana Resource Rubber Private Limited kaba don ha 11 Mer, Mawsmai, Ri-bhoi District jong u Joginder Pal Kapoor. Ia kane la pyntip da u President ka HYC u Bah Roy Kupar Synrem hadien ka jingiakynduh ia u EM ba khmih ia ka tnat Trade u Bah Gigur Myrthong. Haba kren sha ki lad pathai khubor hadien ka jingialang, u President ka HYC u Bah Roy Kupar Synrem ula iathuh na ka liang u EM ula pynksan ba ki kot ki sla jong u Joginder Pal Kapoor ki la kut naduh u bnai Iaiong 2024.
U Bah Roy Kupar ula pynksan ba ka jingleit khang tala ka HYC ia ka karkhana Resource Rubber Private Limited ka dei namar ba ka District Council ka khlem leh ia ka kamram hynrei kaba lyngngoh, ba ki Pulit hynnin ka sngi, ki la leit pynpait ia ka tala. “Ka KHADC kaba thaw ia ka ain hynrei kaba lyngngoh, ki bor pyniaid ka Council, ki khlem khang tala, watla ki kot ki sla jong kane ka karkhana, ki la kut naduh u bnai Naitung 2024” la ong u Bah Roy Kupar.
U President ka HYC ula ong ba ka jingleh ki bor Pukit ka Ri-bhoi District bad u Joginder Pal Kapoor ban bteng ia ka kam hapoh u pud u sam jong ka KHADC ka long beain bad pyrshah ia ka Regulation Trading by Non-Tribal 1954. “Ka Section ba3 jong ka Regulation Trading by Non-Tribal 1954 ka kdew shai ba kino kino ki bar Jylla kiba kwah ban khaii ki donkam ban ioh ia ka Trading License napoh ka District Council” ula ong. U Bah Roy Kupar ula ong ba lada ki bor pyniaid ka KHADC, kim lah ban pyntreikam ia ka ain ba la thaw, kam don jingmut ban don ka ophis jong ka Council ha Nongbah Shillong.
