Da ka jingsngewkhia kaba jur namar ka jingnang kiew ka jingkyrni bad ka jingnang ngop ki samla ha u druk u ba la long shisha u nongshun ba khraw ia ka imlang ka sahlang, na ka liang ka kynhun jong ka Cinchona Sport Club ha ryngkat ka jingiakyrshan lang da ka tnad District Social Welfare Officer, Ri Bhoi District, ka la shim da ka sienjam ban pynlong da ka prokram ai jingnang jingtip ha kaba ia dei bad ki jingma na ka jingdih buaid khamtam u drug, ia kane ka prokram la sdang shwa da ka jing mareh marathon kaba 4 kilometres na Saiden sha ka madan Pahamsyiem.
La wan ban shim bynta ha kane ka prokram ban ai jingtip jingnang ha kaba ia dei bad ki jingma jong u druk da u Bah Meban Tariang, ba la mihkhmat na ka Kripa Foundation, ka Kong R. Lyngdoh, District Mental Health Programme na ka Civil Hospital Nongpoh, ki nongialam ka Cinchona Sport Club ba kynthup ia u Bah Robin Lyngdoh, President, u Bah Anthony Nongkynrieh, Secretary nalor kiwei kiwei ki riew rangbah. Haba sdang ia kane ka prokram ai jingtip jingpynshai halor ki jingma na ka jingkyrni jong u druk, la sdang da ka marathon ba la shimbynta da palat spah ngut ki samla kiba la shim bynta da ka jingshitrhem ha kane ka jingiakop mareh marathon.
Na ka liang ka Cinchona Sport Club ka la sam ruh ia ki khusnam sha ki nongjop ha ka marathon ba kynthup ia ki nongjop ha ka liang ki shynrang, ha kaba u Monas Bongrung u la iohrah ia ka nam ba nyngkong, bud sa u Jemon Makri, bad u Lapynkhraw Thabah, ha ka liang ki kynthei ki nongjop ki kynthup ia ka Filinza Hansepi, ka Barisha khamdeit bad ka Julina Bongrung.
