Ka KSU Namdong Area Unit ka la pynkup burom ia ki samla pule ka thain kiba pass bha ha ki kyrdan bapher bapher jong u snem 2024 da ka 4th Mait Shaphrang Excellence Award. Ha kane ka sngi la sakhi lang da u waheh Shnong jong ka thaiñ Ma DS War. Ia ka jingialang pyn-kup burom la pyniaid da u President ka Namdong Area Unit u Samla Kitboklang Lamare. Kiwei kiba ia don lang ha kane ka sngi ki long u President ka Nartiang Circle Samla Chanbor War, Samla Leonard Dhar Office Secretary WJHDU, Samla Ewanmi Phawa Organizing Secretary WJHDU, Waheh Shnong ka Namdong B, Ma DS War bad kiwei kiwei de.
U Samla Laitphar Syngkrem, President KSU West Jaintia Hills District Unit kum u kongsan, haba ai jingkren u la ong ba ka jaidbynriew Khasi ka dang duna kiba bat iaka la kam synshar hapoh ka jylla, khamtam eh haki kyndan baheh kum ki IPS, IAS bad ia kane la bun ba bat da ki bar jylla. Kumta ka KSU ka shim iaka sienjam ban ai khusnam sha ki samla pule ka bri Hynniewtrep kum ka jing pynshlur bad ai mynsiem ban ialeh shitom bad ban poi sha khmat.
U la kyntu ia ki samla ba kin dang iai ialeh tyngeh shuh shuh ban minot thop, khnang ba kin poi sha ki kyrdan ba kham shalor bad u la ong ruh ka burom ka akor ki hap ban sdang nala iing, lada ki don ka kyrdan katno katno ruh lada ka burom akor kam don ka long lehnoh ei.Kane ka long katkum ka kyrwoh khubor na u samla Heibormi Lamare, Education Secretary Namdong Area Unit.
