U Commissioner & Secretary ka Government Meghalaya ka tnat Information & Public Relations u Vijay Kumar Mantri hynne ka sngi ula lum ka jingialang bad ki nongshna phlim ka Jylla. Kiba wan shim bynta ha kane ka jingialang ki kynthup u Dominic Sangma, Pradip Kurbah, Commander Shangpliang, Section Syiemlieh, bad ka Kong Simi Khongthiang lem bad kiwei kiwei de.Ha kane ka jingialang, la iakren halor ki jingeh ba iakynduh ki nongshna phlim ka Jylla. La rai ruh baka tnat Information & Public Relations ka Sorkar kan pynbiang daka Draft halor ka Film Policy naka bynta ban kyrshan bad ban plie ka lad iaki nongshna phlim ka Jylla bad ban khring iaki nongshna phlim na bar Jylla ban wan ring phlim hapoh ka Jylla.
Ka Film Policy kan khmih ruh ia ka jingpyllait ia ki phlim hapoh ka Jylla, shaki kyrdan national bad international naka bynta ban kyntiew iaki phlim napoh Meghalaya. Kane kan dei ruh ban kyntiew iaka film culture hapdeng ki paidbah daka ba thaw iaki Film Clubs haki schools bad colleges. Naka liang u Commissioner & Secretary ula ai mynsiem iaki nongshna phlim ban iatylli hapoh kawei ka kynhun bad ban shim kabu naki skhim Sorkar Jylla bad naka tnat Information & Broadcasting Ministry bad kiwei ki Agencies.
Ula ong baka jingthaw iaki Film Society kan plie lad iaki nongshna phlim ban iakren hal or ki jingeh ba ki kynduh.U Commissioner & Secretary ula ban ruh iaka jingdonkam ban don ka Single Window Agency ban kyntiew iaki phlim namar ka Sorkar Jylla ka kwah ban pynsuk iaki jingdonkam ki nongshna phlim kiba kwah iarap naka Sorkar.Ula ong baka Sorkar kan shim khia ban kyntiew iaki phlim lyngba ki Channel bapher bapher kum haki cinema halls, screening bad lyngba ka juk OTT platform. Nalor kane u Commissioner & Secretary ula pynpaw ka jingdonkam ban ialap paidbah iaki phlim hashuwa ban pyllait paidbah.
