Da ka kontrak bunsnem soi ka Bengaluru FC ia u Chinglensana Singh

Ka Bengaluru FC, ha ka sngi Ba-ar ka la pynbna ba ka la soi ia u bak kynsai, u Chinglensana ‘Sana’ Singh ha ka kontrak bun snem. U Sana u dei u rangialehkai ba nyngkong ban iasoh bad ka BFC hapoh ka jigialam, u coach na Spain, u Gerard Zaragoza. U Sana u la rah ia ka trophy Indian Super League (ISL) bad ka Hyderabad FC ha ka samoi 2020-21 hynrei u la pynkut noh ia ka kontrak na ka bynta ban ioh mih madan ia ka BFC.

“Ka Bengaluru FC ka dei ka team ba nga iapmat bha lashem bad ka team kaba jop. Kane ka club watla ka dei kaba dang thymmai pynban ka la lah ban khur bun ki trophy bad ha ka dohnud nga khmih lynti ba shisien ka sngi ngan ioh mih madan ia kane ka club bad shisha mynta ka la urlong.,” ong u Sana mar shu poi ha nongbah Bengaluru. Une u rangialehkai ba dang 27 snem ka rta na Manipur, u  la sdang ia ka ialehkai professional ha ka I-League na ka Shillong Lajong ha u snem 2015, bad hadien kane u la iasoh bad ka Delhi Dynamos, FC Goa bad Hyderabad FC ha ka Indian Super League (ISL).

Na ka liang u coach ka BFC ruh u la pynpaw ia ka jingkmen hadien ba la ioh soi ia u Sana bad ong ruh ba u dei uwei na ki centre- ba kynsai ha India. U Sana u dei ruh u rangialehkai bar-ri ka India uba la mih madan 11 sien bad u don bynta lang ruh ban pynjop SAFF Championship hapoh ka jingialam u Sunil Chhetri. Ka Bengaluru FC kan aireng pyrshah ia ka Chennaiyin FC ha ka jingiakhun ISL ha Kanteerava Stadium ha ka 7 tarik mynta u bnai .