Da ka jingangnud ban pynphriang lem ia u synñiang u bynhei halor ka jinglong jingman kum kita ki nonghikai kiba tbit ban ai jingnang jingtip sha ki khynnah pule, ka Kong Baiarlin Nongrang kaba dei ka Principal jong ka UCC Higher Secondary School lem bad ka Dr. Mistilia Dkhar ki la ioh ban pynlait paidbah ia kawei ka kot jong ki kaba lanai kyrteng kum ka “Teachers Attitude towards Teaching of Elementary Level of Education. Ia kane ka kot la pynlait paidbah mynta ka 29 tarik Nailar hapoh ka Conference Hall jong ka UCC College ha Umbir, ha kaba la wan ban ia donlang ruh da u Principal ka UCC College u Dr. RM Manih, u Bah PJ Kurbah, Rangbah Shnong ka Umbir, ka Kong Baiarlin Nongrang, ka Dr. Mistilia Dkhar nalor kiwei kiwei ki nonghikai bad ki bahaiing hasem jong ka Kong Nongrang. Haba kren ha kane ka program, ka Kong Baiarlin Nongrang ka la iathuh, ba hashwa ba kan thoh ia kane ka kot ka la dep ban leh shwa ia ka jingwad bniah bha halor ka rukom long jingman ka lad jinghikai naduh ki kyrdan ba kham rit kumno ban pynbit pynbiang ia ki lad jinghikai da ki nonghikai sha ki khynnah pule kaba tip kum ka quality education, ka la sdang ia ka jingwad bniah naduh ka por ba dang don ka jingkhang dam lyngba ki jingkylli ba pynioh lyngba ki khynnah pule bad hadien la pynbit pynbiang ia ki jingtip hashwa ban pyndep ia ki jingthoh ba pura.
“Ia kane ka kot la ioh jingiarap ruh lyngba ki guide jong i, ha kaba la lah ban thoh ia kane ka kot kum ka jingiarap na bynta kito ki nonghikai kiba hikai ha ka Elementary Level ban wanrah ia kata ka lad jinghikai kaba bit bad kaba paka (quality) ba kumno phi hikai haba ki don ha ki kamra klass, kumno ban pyniadei bad ki khynnah pule, kumno ban iarap ia ki khynnah kiba dang don ha ka jingthrang ban long kiba bit ba biang ha ka jingstad, kumno ba kin thew ia ka rukom ai jinghikai la ki biang ne em ha ki rukom ai jinghikai bad kiwei kiwei ki lad ban pynskhem ia ki lad jinghikai lyngba ki nonghikai”, ong ka Kong Nongrang. Ka la ong ruh, ba kum ka nonghikai kaba la sdang ia kane ka kam naduh ki kyrdan class kiba rit, ki upper primary terter haduh mynta ha ka Higher Secondary nga la mad ia kita ki lynti iaid kiba bun bad kumno ban pyntbit ialade tad haduh ba la pynkhamti ia ka kam kum ka Principal, hynrei ka la ong, ba kam ju klet pat ban ai jinghikai wat naduh ki khynnah pule ne ki para nonghikai kiba hikai ha ka Elementary Level bad ka ju ai mynsiem ia ki ban pynsaphriang ia ki lad jinghikai kiba tbit bad kiba paka na bynta ka lawei jong ki khynnah pule.
Na ka liang ki nongkren ha kane ka sngi, ki la ai jingiaroh ia ka Kong Baiarlin Nongrang kumjuh ia ka Dr. Mistilia Dkhar, kiba la lah ban pyndep ia kane ka kot kaba la pynlait paidbah mynta ka sngi, da kaba ai jingiaroh khamtam ia ka jingdon jingmut jong ka Kong Nongrang kaba angnud ban phriang ia ki jingtip jingnang ban sam lem ia kita ki jinghikai kiba paka lyngba kane ka kot kaba I la dep thoh pyndep bad pynlait paidbah.”Ka Kong Nongrang ka dei kawei na ki longkmie ymtang kum ka nonghikai kaba treishitom ban kyntiew ia ka pule ka puthi ha kane ka Union Christian College bad kiwei kiwei, hynrei ka dei ka longkmie kaba treishitom bad kaba angnud ban kyntiew ruh ia ka imlang ka sahlang, ki kam shnong bad ki kam iing kam sem, bad mynta lyngba kane ka kot kan nang long shuh shuh kum u synñiang ban kyntiew ia ka rukom ai jinghikai, ka rukom long jong ki nonghikai ha ka Elementary Level kumno ban pynbit ialade bad ban ai jinghikai kiba paka sha ki khynnah pule”, ong ki nongkren.
