Da ka Workshop synniang dkhot met, pynlong ka NEIGRIHMS

Ka Workshop ka baar sngi halor ka phang ‘Deceased Organ Donation’ ne ka jingnoh synniang iaka dkhot met jong kiba la khlad noh, kaba la pynlong NEIGRIHMS, ka Zublee Foundation bad ka North Eastern Development Finance Corporation (NEDFi) kala kut noh hynin ka sngi Saitjaiñ. Ha katei ka Workshop kaba ar sngi la waniashimbynta da ki doctor, ki Nurse, ki samla pule bad ki nongtrei jongka NEIGRIHMS bad kila don 200 ngut kiba la wan iashimbynta ha kane ka workshop ha kaba kila ioh ia ki jingtip kiba paka bad kiba bniah halor ka phang Deceased Organ Donation bad Transplantation.

U Director ka NEIGRIHMS u Prof. Nalin Mehta, haba ai jingkren ula ong, ba kane ka workshop kala long ka rynsan kaba kongsan bha na ka bynta kito kiba ai jingsumar, ki samla pule bad ia ki nongtrei ban ioh ia ki jingtip kiba bniah bad ban shimkhia ia kino kino ki bynta kiba iadei bad ka jingnoh synniang ia ki dkhot met ki jongki. “Nga ngeit ba kane ka sienjam kan iarap shibun ha kaban pynsngewthuh bad ban pynshlur ban don ia ka jingiakren ban noh synniang ia ki dkhot met hapoh ka imlang sahlang jong ngi, khamtam eh ha ka jylla Meghalaya, ha kaba ka jingpynsgewthuh paidbah ia ka jingnoh synniang ia ki dkhot met ka long kaba dang duna bha bad kum kine ki workshop ki long kiba kongsan ban ai jingtip bad ban pynsngewthuh ia ki paidbah bad ban weng ia ka jingbym ngeit ka jongki bad ia ki jingsngewthuh bakala hynrei ban pynshlur pat ia ki paidbah ba ka jingnoh synniang ka jongki ia ki dkhot met kan long ka jingiada ia ka jingim jong kiwei pat” ong u Dr Mehta.

Katba u Medical Superintendent ka NEIGRIHMS Prof. (Dr) C. Daniala, ula ong, “Ka NEIGRIHMS ka iengskhem ban pynurlong ia ka jingnoh synniang ia ki dkhot jong ka met na ka bynta kito kiba donkam bha bad ngeit ba kane ka sienjam ka don ia ka lad ban iada ia ka jingim jong kiwei pat ha ki snem ban wan”.