Da ki kor buh ka MSPCB ban peit ka jingjaboh ka lyer ha Byrnihat

U Myntri Rangbah ka Jylla Conrad K Sangma ula pyntip hapoh ka ïing dorbar ba ki kaiphod bad ki jinglum jingkhein haba iadei bad ka jingkhuid ka lyer ha Byrnihat, Ri-Bhoi District ki la pyni ba ka la kham biang bad kam pat ju hiar sha u pud na kaba sniew sha kaba palat.Ia kane u Conrad ula pyntip haba jubab iaka Call Attention ba la wanrah da u MLA ka Jirang constituency u Bah Sosthenes Sohtun uba la dawa ruh ban buh noh da ka Meghalaya State Pollution Control Board (MSPCB) office ha Byrnihat bad ha kajuh ka por ban iatreilang bad ka Sorkar Assam ban jurip ia ki jaka ba don ki karkhana.

Haba jubab iaka Call Attention “Wat hapdeng ki kaiphod kiba pyni ia ka jingkhuid ka lyer ka la kham biang, ngim shym la shim sting satia ia kane ka kam bad naka liang ka Sorkar Jylla ka iatreilang bad ka Sorkar Assam halor kane”. U Conrad ula ong ba ka Byrnihat ka dei kaba don ha syndah khappud ka Assam bad ki karkhana ki dei kiba don ha baroh arliang u pud bad ka jingpaw ba ka Byrnihat ka dei kaba jaboh tam namar kiba wan jurip kim tip ba kane ka jaka ka hap lang bad ka Assam.

Ula iathuh ruh ba Meghalaya State Pollution Control Board (MSPCB) ka la pyndait ia ki kor, ka ban ai jingkhein ia ka jinglong ka lyer manla ka sngi bad kan pyndonkam ruh ia ki kor ka juk mynta ban peit thuh ia ka jingjaboh jong ka um.“Namar kata, watla ngim buh ia ka Branch Office ka MSPCB, ka kor ka la don ban peit ia ka jingjaboh ka lyer” ula ong haba bynrap “Ngi lah ban shong bishar ia ka jingtyrwa hynrei kumba nga ong ba da ka jingdon ki kor ki bor, ngi lah ban lum jingkhein watla kam don ka Ophis hapoh ka thain” ula ong.