U Myntri Rangbah ka Jylla u Conrad K. Sangma hynne ka sngi ula pynthikna ba yn pynlong ia ka Concert jong u Bryan Adams ha JN Sports Complex ha ka 10 tarik u Nohprah mynta u snem bad yn pyndonkam da ki kor teknoloji ba kan ym don kano kano ka jingktah ne jingsniew jong ka madan ialehkai. Haba iakren bad ki nongthoh khubor u Myntri Rangbah ula ong, ba yn pyndonkam da ki teknoloji kiba thymmai kiba la pyndonkam ha kylleng satlak ka pyrthei ban iada ia ka madan ialehkai ha ka por ba pynlong ia ki jingialang paidbah, ki jingialang ne Concert.
U Conrad ula ong “Ki kor teknoloji kiba don mynta, ki ailad ia baroh kawei ka madan ialehkai kaba mih phlang ban shah tap da ka rynsan kyrpang ban ioh ia ka jingiada, kaban pynthikna ba ki paidbah kin ym ioh ban iuh beit beit ia u phlang ne ban pynjot pynsiew ia ki”. U Myntri Rangbah ula ong ruh, ba ka sorkar kan pynthikna ba ki nongpyniaid ia ka concert kin bud ryntih da kaba pyndonkam da ki kor teknoloji ban iada ia ka madan ialehkai ban lait na kano kano ka jingsniew ne jingjot bad ula ong, ba ka lah ban don ka jingsniew kaba khyndiat khynsoit ia ka madan ialehkai hynrei yn lah ban thung biang ia u phlang hapoh jong ka 7 sngi bad kane kadei kaba la leh ha ka pyrthei baroh kawei.
Ula bynrap ka jingkitkhlieh kan dei ia ki nongpyniaid ba kin pyntreikam ia katei ka rynsan bad ka sorkar kan khmih bniah ia ki kor teknoloji ki ban pyndonkam ban pynthikna ba ka dei ban long katkum ka kyndon kaba la buh hashwa ban ai iaka jingmynjur.
