Ban pynduh jait ia ka jingwan poi Drok hapoh Meghalaya, ka Sorkar Jylla ka la rai ban pyntreikam noh da ki Vehicle Scanning Machine (VSM) ban eksamin ia ki kali ba rung shapoh kane ka Jylla. Kane ka mut ba baroh ki kali kiba wan rung sha Meghalaya kin hap ban iaid lyngba ka Vehicle Scanning Machine (VSM) bad ia ki VSM yn pyntreikam shwa ha Ri-Bhoi District bad East Jaintia Hills. Ïa kane ka rai la shim ha ka jingïalang jong ka Drugs Reduction Elimination & Action Mission (DREAM) bala khlieh da u Symbud Myntri Rangbah ka Jylla u Bah Prestone ha ka jingdonlang u Myntri ka Tnad Social Welfare u Bah Paul Lyngdoh. Haba kren sha ki lad pathai khubor u Bah Paul u la ong ba ka jingsdang ban pyntreikam ia ki VSM ha Ri-Bhoi bad East Jaintia Hills kadei namar kine artylli ki District ki dei kiba jur bha ka jingwan poi Drok hapoh Meghalaya.“Ngi la iakren ia ka jingdonkam ban pynieng ia ki Vehicle Scanning Machine ha ki Entry Point jong ka Jylla kaba mut ha Ri-Bhoi bad EJH. Ia kine ki machine yn pyndait hapoh ka hynriew bnai. Ka jingpyndait ka donkam ruh ia ki briew kiba la tbit ban pyndonkam ia ki tiar bad ban ioh bat ia kano kano ka kali kaba ishankhmat” la ong u Bah Paul.
U Bah Paul u la ban ba hadien ka jingpyntreikam iaki VSM, baroh ki kali kin hap iaid lyngba ki Screening Machine. “Ym don kawei ka kali ka ban lait shah eksamin haki VSM lada ki rung sha Meghalaya lyngba ki Entry Point” u la ong. U Myntri ka tnat Social Welfare u la pyntip ruh ba ka jingialang kala rai ruh ban nang pynkhlain shuh shuh ia ka Anti Narcotics Task Force (ANTF) ban iakhun pyrshah ia ka kam khaii droks hapoh ka Jylla.“Ngi la bthah ia ka DGP ba kan pynkhreh ia ka jingtyrwa halor ka jingdonkam briew kiba lah ban buh beit thik sha ka ANTF khnang ba kan nang pynkhlain ia ka jingtreikam ha ka jingiakhun pyrshah ia ka kam khaoo droks” ula ong haba bynrap “Ka jingkhaii droks, kaba dei ka jingma ba khraw bha ia ka Jylla namar ka jingiajan ia ka iew droks, kaba dei ka Myanmar nalor ba ka Jylla ka don ia ka lynti iaid kaba jrong na kawei ka Jylla sha kawei pat kata naduh Ri-Bhoi sha EJH”.
Ha kajuh ka por, u Myntri ula ong ba ia ka Meghalaya Police Act, 2010, yn sa pynkylla noh khnang ban lah pynbiang ia ki jingdonkam jong ki Volunteer, kiba dei shibynta jong ka Village Defence Party (VDP). “Ka jingdon ki VDP volunteer ruh la dep buh ba kan long 15 ngut kawei ka party khnang ban pynthikna ba ha ki jaka kiba kham duna briew, ngin dup lah ban ioh ia ki briew ba donkam” ula ong haba pyntip ba la shim ruh ia ka sienjam ha kaban pynkiew noh ia ka jingsiew ia ki VDP volunteer. Halor ka jingwanrah ia ki Fast Track Courts, u Bah Paul ula ong “Ngi la rai ruh ba ka don ka jingud jingnam na ki paidbah halor ka jingiaid slem palat ki mukotduma kaba la ktah ruh ia ki nongmudui bad ki nongai sakhi…kumta ka Sorkar Jylla kan sa thoh lyngba u Myntri Rangbah ka Jylla bad ruh ban iakren bad u Chief Justice ka High Court ka Jylla khnang ban lah pynsted noh ha kaban pynkha ia ki fast track court, ki ban tian bishar ia ki mukotduma manla ka sngi”.
