Ka Dorbar shnong Laitumkhrah ka dang ap ia ka rai na ka sorkar na bynta ban pynkynriah ia ki nongdie madan sha ka jaka ba la pynkhreh. Kum ban shu pynkynmaw ka Myntri ka tnad ka rep ka riang ka jylla ka kong Ampareen Lyngdoh, ka la ong ban pynkynriah noh ia ki nongdie madan sha ka jaka ba la pynkhreh ka sorkar ha shwa ka 15 tarik Rymphang hynrei kane kam shym la urlong satia. Ha ka jingiakren bad u Rangbah shnong ka Laitumkhrah u bah Andrew A Jyrwa, ula ong ba na ka liang ka shnong ka la don jingpynkhreh bad ka jingpynbeit, hynrei kan ap shwa ia ka rai ka sorkar.
Katkum ka jingong u Rangbah shnong, ha shwa ka elekshon MP ka la dep don ka jingiakynduh lang hapdeng ka dorbar shnong Laitumkhrah bad ka sorkar, hynrei ka dang sahteng haduh mynta bad na ka liang ka dorbar shnong ka la iai ap beit na ka sorkar, ban pynkynriah ia ki nongdie madan na surok. U bah Andrew u la ong, ka shnong kan iaid katkum ka ain, katkum ka rukom, kam mut ba shu weng ne beh jyndat ia ki nongdie madan, hynrei yn iaid katkum ka ain.
Ula ong na bynta ban iarap ia ki nongdie madan ruh, ka dorbar shnong ka la don ka jong ka jingpynkhreh bad yn sa iakren ynda la dei ka por bad ka sorkar. Kum ban shu kdew u nongaiktien ka sorkar jylla, u bah Paul Lyngdoh dang shen, u la ong ba ka sorkar kam ym pynslem shuh ban pynkynriah noh ia ki nongdie madan la kumno kumno haduh u Naitung ban wat ia kito kiba die madan ha thain Khyndai Lad ruh yn pynkynriah.
