U Myntri Rangbah ka jylla u Conrad K Sangma, hynne ka sngi ula leit jurip ia ka surok na Wansing Bazar shaduh Dorrengre ban peit ia ka jinglong jingman jong katei ka surok. Ha ka jingiakren jongu Myntri Rangbah bad ki paidbah hadien ka jingwan jurip, u Conrad K Sangma, ula ong ka long kaba donkam ia ki nongialam shnong ban shna noh ia ka surok. “Kane ka surok na Dalu-Gambegre kadei kaba jan bha bad ka Tura bad ka long ruh kaba kongsan bha ia ki paidbah ha ka thain bad haba ki wan iakynduh ia u ki ju pynsngew man la ka por ia ka jingdonkam ban shna noh ia katei ka surok. Nga dap da ka jingkmen ban pytnip sha phi mynta ka sngi ba ka DPR na ka bynta katei ka surok la pynkhreh da ka tnad PWD bad shen ki kam ki jam kin sa sdang noh” la ong u Conrad.
Ka surok na Wansing Bazar sha Dorrenge ka long kumba 5.5 Km bad la bhah tyngka ban tei ha ka jinglut jingsep kaba kot T.5.56 Klur. Ki nongshong shnong ki la pynsngew ruh ha u Myntri Rangbah ha kaba iadei bad ka Chisakgre Sub Centre ha kaba la sdang ban tei ia kawei ka building hynrei la pynkut noh ia ka jingtrei. Ki nongshong shnong kila kyrpad ia u Myntri Rangabh ban pykhie im biang ia katei ka kam bad ban tei pyndep noh na ka bynta ka bha ka miat jong ki nongshong shnong bad kila pynpaw ruh ha u Myntri Rangbah ia ka jingdonkam ban don sa uwei u Transformer bad ka jingsop da ki tin ia ki dukan kiba don ha ka Wansing Bazar.
U Myntri Rangbah ula pynthikna ia ki paidbah ka thain ba yn sa khmih bniah ia ki jingdawa jong ki paidbah na ka bynta ban shna da ka tin ia ki dukan yn sa bei tyngka lyngba ka Chief Minister’s Development Fund.
