U Myntri Rangbah ka jylla u Conrad K Sangma hynne ka sngi ula lum ka jingialang jong ka Climate Change Council ha Shillong.
Ia kane ka jingialang la lum na ka bynta ban khmih bniah halor ki prokram kiba pyntreikam da ki tnad sorkar bapher bapher.
Ha kane ka jingialang la wan ia shim bynta da u Myntri ka tnat PHE u Marcuise Marak, ka Myntri ka rep ka riang bad ka koit ka khiah ka Dr Ampareen Lyngdoh, u Myntri ka tnat Bording u AT Mondal, u Myntri ka tnat Cooperation u Bah Coming One Ymbon, ryngkat bad ki heh ophisar na ka tnad Forest and Environment, Meghalaya Basin Development Authority, PHE bad kiwei kiwei.
Ha kane ka jingialang ka la iatai sani halor ka jingiatreilang hapdeng ki tnad sorkar bapher bapher bad baroh kiba iadon bybta lang ban iada ia ki jingdon jingem jong ka mei mariang bad ban shimkhia halor ki bynta na ka jingshah ktah ka jingkylla ka suinbneng.
Ka Council ka la iatai sani bha ia ki sienjam kiba la shim da ki tnad bapher ban iada bad ban pynkhie im biang ia ki tyllong um bad ban iada ia ki Catchment Area bad ka rukom pyniaid ia ki kam ki jam kiba ia dei bad ki jingdon jingem ka mei mariang.
Ula kyntu ia ki tnad sorkar ba kin shimkhia bha bad ban shim ia ki sienjam ha kaba iadei bad ka jingkylla ha ka suinbneng.
U Myntri rangbah Conrad Sangma ula ong, “Ka jingkular ka jong ngi ban pynneh pynsah ia ka Mei mariang ka donkam ia ka jingiatreilang da ka jingitylli lang kawei. Da kaba iatreilang bad iatyllilang hapdeng ki tnad sorkar bapher bad baroh kiba don bynta lang ngin lah ban thaw ia ki lad ki lynti ba biang na ka bynta ban ioh ia ka jingjyrngam bad ka lawei kaba shngain ia ka Meghalaya.”
Ka jingialang ka la ieng skhem ha ka nongrim jong ka sorkar ban shimkhia ia ki jingeh bad ki jingtynjuh kiba ia dei bad ka mariang bad ban kyntiew ia ka roi ka par.
