Ban pynsah jingkynmaw ia ka jinglehkmen ka jingdap 175 snem ka jinglong Khristan ka Nabon Sawian, ka Kynthei khasi banyngkong ha Ri Khasi-Jaintia ba pdiang ia U Jisu Khrist kum U Nongpynim, na ka liang ka Jingiaseng Kynthei Khasi Jaintia Presbytery Assembly ka la pyllait paidbah ia ka kot ‘Souvenir’ ba la thoh shaphang ka jingim bad jinglen lade jong ka Nabon. Ïa kane ka Souvenir la pyllait paidbah ha ka sngi saitjaiñ 17 tarik da u Rev S.R. Dkhar Senior Administrative Secretary Khasi Jaintia Presbyterian Assembly, ha ka Balang Wahiajer, West Jaiñtia Hills District ba hap hapoh ka Moodymmai Presbytery KJP. Synod Mihngi kaba dei ruh ka jaka ba pynkut ia ka jingrakhe dap 175 snem ka jinglong Khristan ka Nabon Sawian. Ka phang pdeng jong kane ka jingrakhe ka ong, “Ki Kynthei bad ka Mynsiem jingshakri”, bad na ka bynta ban sei ia ki kynthei ba shitrhem ha ka jingshakri, la buh ruh ia ka Topic kaba ong “Ka jingshakri ki kynthei ha ka hynnin, mynta bad ka lashai” Loukas 4:18.
Shwa ban pyllait ia ka Souvenir la don ka jingiaseng duwai ba la ialam da ka Chairperson Jingiaseng Kynthei KJP Assembly kong Sweet Mary Rapthap bad la ioh ka jingpule bad duwai na ka kong Pyntngen Talang, ki jingkren pdiang na u Rev. H. Pale. Ka Kong Apphira Sylliang Secretary Nabon Jubilee Committee ka iathuh ba ia ka jingrakhe dap 175 snem ka jinglong Khristan ka Nabon Sawian, la sdang naduh 19 tarik bad 20 tarik Nailar 2023 ha ka Balang Presbyterian Nongsawlia, Sohra. Ka iathuh ha kane ka souvenir ki don ruh ki jingthoh ba kordor ban long ka jingiarap bad jingkyrkhu ia ki nongpule.
U Rev S.R. Dkhar Senior Administrative Secretary Khasi Jaintia Presbyterian Assembly ula iaroh ia ka jingtrei shitom ki longkmie na ka bynta ka kam jong U Blei, ula pynkynmaw ruh ia ki kyntien ba batai halor ka jinglong jong ka kynthei kaba ong, “Ka pyrkhat kum u shynrang, ka leh kum ka kynthei, ka long kum ka khynnah samla bad ka briew kaba don bun ki sap”.U la bynrap ba kine ki dei ki jinglong ba ki kwah ban iohi ha ka long rynieng jong ki longkmie. Ha kane ka sngi la donlang u Rev. CL. Laloo Moderator KJP Synod Mihngi, u Rev K. Pariat Senior Administrative Secretary, Rev. HL. Khongwir Moderator KJP Synod Sepngi bad kiwei. Bad la ioh ruh ka jingrwai Choir na ka Jingiaseng Kynthei Balang Wahiajer.
