Ka Hynniewtrep Integrated Territorial Organisation (HITO) South West Khasi Hills District mynta ka sngi ka la hiar jurip kynsan kynsan ia ka Civil Hospital, Mawkyrwat, South West Khasi Hills District hadien ba ka la ioh bun tylli ki jingujor ha kaba iadei bad ka jingtreikam kane ka Hospital.Haba kren ha ki lad pathai khubor, u Working President ka HITO South West Khasi Hills District, u Bah Bitnam Nongsiej u la kam ba kawei na ki jingujor ba ka seng ka la ioh ka long halor ka jingkynnoh kren tohmet da ki doktor bad ki nongtrei jong katei ka Hospital ia ki nongpang kiba leit shah sumar, bad halor kane ka bynta ka seng ka la ai da ka jingmaham ba tyngeh ba lada ka dang ioh biang kum kine ki jingujor, ka seng kam banse ban leh da kaba tyngeh.
U Bah Bitnam u la iathuh ruh ba ka seng ka la ioh ruh ia ka jingujor na ki paitbah nongpang halor ka jingbym biang ki tiar ki tar bad ki kor ki bor ban leh test na ka bynta ki jait jingpang bapher-bapher, bad kumta ka seng ka la dawa na ki bor bahalor ba kidei ban pynbiang ia ki jingdonkam baroh hapoh kane ka Hospital kiba kynthup naduh ki kor X-ray, Ultrasound scan, endoscopy, bad kiwei kiwei khnang ba kane ka Hospital kan da treikam pura kum kata ka Civil Hospital bad khamtam eh ba kan pynsuk ia ki paitbah jong ka dong ka thain, kiba haduh mynta na ka bynta kiba kum kine ki test ki hap ban leit shaduh sha Shillong.
Ha kawei pat ka liang, u Bah Bitnam la iathuh ruh ba na ka liang jong ka seng ka la ioh jingtip halor ka jingbym biang jong ki jaka sah na ka bynta ki nos bad ki doktor ha katei ka Hospital, bad kumta ka la dawa ba ka sorkar kadei ban pynbiang ia ki jaka sah na ka bynta ki nos bad ki doktor khnang ba kan pynsuk ia ki lada don ki nongpang kiba wan shah sumar namar ba haduh mynta hi ki dang don bun ki nos bad ki doktor kiba hap ban sah ha ki iing wai.
