Ka Hynniewtrep Youth Council (HYC) kala dawa na ka Shillong Cantonment Board (SCB) ban kyndang noh ia ki longiing kiba sah bein ha Lum Survey marjan bad ka Ophis Fire Emergency Services ha Iewduh. Ia kane ka HYC kala pynsngew ha u CEO ka SCB hadien baka seng kala leit jurip ha Lum Survey bad kala lap ba ki don kumba 80-100 ing kiba sah bein ha kane ka jaka.
Haba kren sha ki lad pathai khubor u president ka HYC u Bah Roykupar Synrem ula iathuh ba kane ka jaka ha Lum Survey ka long kaba rit kaha don tang kumba 10 haduh 20, 000 square feet hynrei kaba lyngoh ka long ba ki don jan palat 100 longing kiba sah ha kane ka jaka. “Hadien ka jingiakynduh ia u CEO ka SCB, ngi la ioh jingtip ba ki 80-100 longing ki sah beain ha Lum Survey namar ki khlem pat ioh jingbit naka SCB ne na kino kino ki bor ba dei khmih” la ong u Bah Roykupar.
U Bah Roykupar ula iathuh ba naka liang u CEO ka SCB ula pyntip ba kane ka jaka watla ka hap hapoh ka SCB hynrei ki bor ba khmih kadei tnat Shipai (Defence) kaba don iaka ophis ha Guwahati. Haka jingiakynduh ia u CEO, ngi la ai ruh daka shithi bad ngi la dawa ba udei ban jubab, haba iadei bad ki sienjam baka SCB kan shim naka bynta ban kyndang iaki ba sah beain ha Lum Survey” ula ong.
