Ka Hynniewtrep Youth Council (HYC) mynta Ka sngi ka la dawa ba ka State Bank of India (SBI), Meghalaya ka dei ban pyntreikam beit da ka bhah ba 44 percent ia ki Schedule Tribe ha ka jingthung kam ha ka Grade-C bad Grade-D. Ka seng hynne ka sngi ka la leit ban iakynduh ia u Deputy General Manager jong ka State Bank of India (SBI) ha Dhankheti Shillong, ban pan jingpynshai halor ka jingthung ia ki kam ba lait 77 tylli ha ka jylla.Haba kren sha ki lad pathai khubor u President ka HYC u bah Roykupar Synrem, ula ong ba ka seng ka la ai por 5 sngi ia ka SBI ban pynbeit ban pynshai ia ka rukom thep ia ki kam ba sah thylli ha kane ka shnat treikam.
U bah Roykupar ula ong ba ka seng ka la ioh jingtip ba ka SBI head office na Mumbai kala khot thep kam haduh 77 tylli ki post ha ki Branch bapher bapher ha ka jylla Meghalaya, ha kaba ka Office Memorandum kaba la pynmih ia baroh ki shnat treikam ba dei ban buh 44 percent ia ki khynnah kiba dei da ki trai shnong ha ka kam ba hap ha ka Group C bad D. U bah Roykupar u la ong ba ka seng ka la ioh jingtip ba ki don haduh 77 tylli ki kam na bynta kane ka jylla ha kaba 33 tylli ki kam ba lait la bhah kyrpang na bynta ki Schedule Tribe , 34 tylli na bynta ki General, 8 tylli na bynta ki SC.
Ula ong ba na kine ki 33 tylli tang 3 ne 4 ngut ki samla kiba pass ia ka eksamin, hynrei lait na kata kumba 30 ngut ka SBI ka thmu ban thung ne pyndap da ki schedule tribe kiba dei na kiwei ki jylla. “Ngi ai por ia ka SBI san sngi ban ai jubab bad lada kadei shisha ba ki mut thung da kiwei ki ST na kiwei ki jylla, ngin sa shim da kawei pat ka rai,” ula ong. Ha kajuh ka por, ula ong ba lada hapoh san sngi kim lah ban ai jubab ka seng kan sa pynlong ia ki jingiakhih ha kylleng ki jaka jong Khasi bad Jaintia Hills ban pyrshah ia ka SBI khnang ba kin sngewthuh ba kim dei ban leh kamai.
