Ka seng sain̈ pyrthei Khun Hynniewtrep National Awakening Movement (KHNAM) hynne ka sngi, ka la ai jingthoh sha ka Expert Committee halor ka State Reservation Policy ban ai bhah 50% ia ki Khasi-Jaintia ha ka State Reservation Policy kaba long katkum ka jingbun paid ha jylla.Ka KHNAM hapoh ka jingialam u President u Bah Pyndapborthiaw Saibon ki la leit sha Secretariat ban ai jingthoh sha ka Expert Committee ban pashat ia ki jingai jingmut da ka seng halor ka jingthmu ban pynbeit thymmai ia ka Reservation Policy ha ka jylla.Haba iakren bad ki nongpathai khubor u Working President ka KHNAM u Bah Thomas Passah ula ong, ka KHNAM baroh shikatta ka la ai jingthoh sha ka sorkar jylla halor ka jingthmu ban pynbeit thymmai ia ka State Reservation Policy hynrei mynta ki la wan ban ai da ka jingthoh, hadien ba ka Expert Committee ka la pan ban ioh ia ki jingai jingmut ia ka jingthmu ban pynbeit thymmai ia ka Reservation Policy.
“Ngi dawa ba dei bhah 50% ia ki Khasi-Jaintia, ban pynshong nongrim katkum ka jingbun paid jong ki paid riewlum trai shnong ka Jylla” ong u Bah Passah. Ka KHNAM ka la pynpaw katkum ka Para 1 jong ka Policy, ia ka jingai bhah dei ban pynshong nongrim katkum ka bun paid ki riewlum trai shnong ka Jylla kata ki Khasi, Jaintia bad ki Garo bad katkum ka khanasamari ne Census 2011, ka jaidbynriew Khasi Jaintia ki tam 5,78,918 ngut ka jingbun paid ia ki paid Garo bad kane ka jingiapher ka lah ban nangkiew sha ka 9,49,756 ngut haduh ba poi ka jinglum khanasamari ban wan. Kumta ban iaid shakhmat halor kane ka mat donkam ban kheiñ ia ka jingbun paid khnang ba ka bhah kam ne Reservation policy kan ym noh shiliang.
U Bah Thomas ula ong, ka KHNAM ka la ai jingmut khnang ban ym mih kano kano ka kynrum kynram hapdeng ki paid Khasi, Jaintia bad Garo kumta dei ban khein kyllum lang noh ia ka bhah kaba 80% jong ki paid Khasi Jaintia bad Garo, da kaba pynshong nongrim ia ka jingwan shakhmat ne katkum ka Merit bad kane kan pynksan ia ka kyndon jong ka “Maintenance of Efficiency in the Adminsitration” kumba kdew ha ka para 1 jong ka Policy. Ka KHNAM ka la ai jingmut ha ki kam ba lait ha ki District ha Ri-lum Garo dei ban pyndap tang da ki paid Garo katba ha Rilum Khasi bad Jaintia pat dei ban pyndap da ki Khasi bad ki Jaintia bad ki la dawa ba ia ka State Reservation Policy 1972 dei ban pyntreikam ruh ha ki Semi-Government Department, Corporation, Private Sector bad Private Establishment khnang ba ki samla trai jylla kin ioh kam ioh jam.
