Ka Mawmluh Cherra Cements Employees Union (MCCEU) ka la dawa ba ka sorkar jylla ka dei ban pynkhie im biang ia ka karkhana pynmih dewbilat ka Mawmluh Cherra Cement Limited (MCCL). Kine ki kynhun nongtrei jong ka MCCEU ki la pynsngew ia kane ka jingdawa ha ka jingiakynduh mynta ka sngi ia u Myntri Rangbah ka Jylla u Conrad K Sangma. Ha kane ka jingiakynduh jong ki ia u Conrad ki la kyntu ia u ba un tuklar na bynta ban lah ban pyniaid ban pynkhie biang ia kane ka karkhana pynmih dewbilat bad ban pyntreikam ia ki skhim ki ban weng ia ki jingeh jong ki nongtrei.
Kum ban shu pynkynmaw, u Myntri Rangbah ka jylla u Conrad Sangma u la ong ba ka sorkar jylla da ka skhim Golden Handshake kan ai khublei kti khatduh noh ia ki nongtrei ka Mawmluh Cherra Cement Limited (MCCL) ha shwa ban khang khyrdep noh ia ka kharkhana pynmih dewbilat kaba rim tam ha kane ka jylla. U President ka MCCEU u bah Shanlang Diengdoh haba kren sha ki lad pathai khubor, ula ong ba na ka liang jong u Myntri Rangbah ula kular ban sa shong bishar ia ki jingdawa bad shen un sa ai jingtip.
U bah Shalang u la ong ba ki jingdawa ki kynthup ia ka jingsiew tulop, ban pyniaid kam ia ka karkhana ryngkat ka jingpynheh nalor ka skhim VRS ne ka Golden Handshake.Ula ong ba ka kynhun ka la kyrpad ruh ia ka sorkar Jylla ba kan pynkiew ia ka song jingiarap pisa khnang ban pynsting ia ka jingeh bala mad da ki nongtrei bad ki bahaiing hasem. Halor ka jingdawa ia ka VRS bad golden handshake scheme, ula ong ba kane ka skhim ka ban sa pyntreikam ka dei ban long na ka bynta kito ki nongtrei kiba la trei 10 snem ne palat kaba rit duh.
