Ka North Eastern Hill University (NEHUTA) hynne ka sngi ka la dawa na ka National Commission for Scheduled Tribes (NCST) ba dei ban weng noh mardor ia u Vice Chancellor ka skulbah NEHU u Prof PS Shukla, namar ki kam pyrshah jaidbynriew riewlum bad ba um lah ban pyniaid ia ka skulbah ban poi syndon sha ka kyrdan ba shatrai duh mynta.Katkum ka kyrwoh na u President ka NEHUTA u Prof Lakhon Kma, ula pyntip ba ki la phah ia ka shithi ka National Commission for Scheduled Tribes (NCST) u Nirupam Chakma halor ka jinglong jingman ka skulbah NEHU khamtam halor ka jingniew bein bad jingleh shilliang khmat u Prof Shukla ia ki jaidbyriew riewlum. “Ngi la rai ban thoh sha phi kum u dkhot ba don ka jingkitkhlieh jong ka National Commission for Scheduled Tribes (NCST) khnang ba phin shim kam ia u VC uba la donkti ban shim kabu bad pyndik ia ki riewlum bad leh ia ki kam ban kiba long pyrshah ia ki riewlum bad ngi dawa ba dei ban weng noh mardor ia u na ka kam” la ong u u President ka NEHUTA u Prof Lakhon Kma ha ka shithi. “Ka jingleh sniew ba rieh u Prof.PS Shukla ka la ktah jur ia ki riewlum bad kaba sngewkhia ia ki riewlum ha Meghalaya ba don 86.15% na ka jingbun paid ha ka jylla bad kiwei pat ki riewlum ha ka thain shatei lam mihngi jong ka Ri. Ha kiba bun ki jingjia ka jingleh shilliang khmat ia ki riewlum kumba la kdew haneng, ka la long kaba palat liam bad la bteng man la ka por ban pynkheiñ ia ka hok ban ioh mar katjuh ne Right to Equality kumba la pynthikna da ka Article 14, 15 bad 16 jong ka Riti Synshar ka ri, ha kine ki 3 snem kiba la dep. Ula pynkhein ia baroh ki rukom treikam ka skulbah bad ia ka NEHU Act, Statutes, Ordinances nad Regulations bad UGC Regulation 2018 naduh ba ula shimti ia ka kam kum u Vice Chancellor ka NEHU ha u snem 2021. Ngi kwah ban kyrpad ia phi ban shim ia ki sienjam kiba donkam ban weng noh mardor ia u na ka kam Vice Chancellor na ka bynta ka bha ka miat jong ka NEHU bad ki riewlum jong ka Meghalaya bad ka thain shatei lammihngi,” la pynpaw ka NEHUTA.
U Prof Kma ula ong, “Haba u (Prof Shukla) ula shimti kum u VC ha u Naitung 2021, ka kyrdan jong ka NEHU katkum ka National Institutional Ranking Framework (NIRF) Ministry of Education, Government of India, ka long ha ka kyrdan kaba 59, hynrei kala hiar sha ka 66 ha u snem 2022, 80 ha u 2023 bad kaba kham sniew tam ka long ba kala hiar sha ka kyrdan kaba 56, nuksa 136 ha u 2014”. Ka NEHUTA la pynpaw ba ka NEHU ka la iohi ia u VC uba sniew tam da u Prof. P.S. Shukla ha kine ki phew snem, uba long u briew uba sarong bad u bym sngewthuh ia ki riewlum bad uba kloi ban pynkhein pyllein ia baroh ki rukom treikam ki ain ki kanun jongka skulbah NEHU bad lada ailad ia u Shukla ba un dang bteng, kan buh ia ka jingma kaba khraw bad kan pynshlur ia u VC ban pynkhein ia baroh ki kyndon ain jong ka skulbah.U Prof Kma ula kynnoh ba u VC ym shim la ai lad ia ki riewlum ka jylla ban shah thungkam ha ki kyrdan Deputy Registrar, Registrar bad Finance Officer, hynrei u VC ula thung ia u Colonel Omkar Singh u shipai uba la shongthait na ka kam kum u Controller of Examinations da kaba kyntait ia ki kyrtong kiba la biang pura na ka jylla Meghalaya. Ula leh shilliang khmat da kaba wanrah bad thung ia u Omkar Singh uba la shongthait na kawei ka skul bad ym shim la don kano kano ka jingshemphang ban trei ha kano kano ka College ne University.
Ka NEHUTA ka la pynpaw ruh ha ka shithi, ba namar ka jingbym sngewthuh bad ka jingbym nang ban pyniaid ia ka skulbah kala don ruh ka jingslem ha kaban pynbna iaki result ha man la ki kyrdan bad kane kala buh pat ha ka jingma kaba khraw ia ka lawei jong ki hajar ngut ki samla pule. U VC u la weng noh ia u Omkar na ka kyrdan Controller hynrei ula thung noh ia u kum u Registrar bad ula kyntait biang ban thung da ki riewlum kiba la tbit ha ka kam. “Ka pyrthei baroh kawei ka la iohi kumno u Omkar Singh ula pynmih ia ka kynrum kynram bad ka jingianiom paidbah ha ka jingpynlong ia ka CUET Undergraduate Examination ha NEHU ha ka 15 tarik u Jymmang 2024, uba la thung hi ia lade kum u Supervisor jong ka CUET Centre ha NEHU, Shillong.” Ka NEHUTA ka la pynpaw ba kine ki jingleh baroh ki jong u Prof Shukla ki la nang pyntroin ia ka skulbah bad ia ka rukom treikam ka jong ka tang namar ka jingbym lah bad ka jingbym nang ka jongu ban pyniaid ia ki kam baroh.
