Khatsan snem mynshuwa ka Meghalaya Energy Corporation Limited, ka la ïoh sngew ïa ka jingud jingnam ki nongshong shnong jong ka shnong Mawryngkneng bad kiwei de ki shnong ba marjan, halor ka jingthut ka bording Electric na ka por sha ka por, kaba ktah ïa ka jingïaid beit ki kam ki jam ha ka jingim man ka sngi. Ha ka snem 2009, ka MEeCL, ka la ïohi ïa ka jingeh jong ki nongshong, naduh ka bording ban pynshai hapoh ïing, ka jingthut ki khynnah bad ki samla pule, ka jingthut ha ki jaka sumar haba duh bording electric bad kiwei de ki jingeh.
Ban pynbiang ïa ka jingsam bording electric ha ka shnong Mawryngkneng bad kiwei de ki shnong kiba don marjan, ha ka snem 2009, ka ka la mynjur ban buh noh ïa kawei ka Power Sub Station ha ka shnong Mawryngkneng ïa kaba ka shnong ka la ai sngewbha ka jaka na ka bynta kane.Mar ïa ïoh ka jingmynjur, naduh ka snem 2009 la sdang pyntrei shaid shaid ban pynïeng ïa kane ka Sub Station bad ka jingpyntrei ïa kane ka kam ka la ïaid sted, naduh ban pynïeng ïa ka ïing ban buh ïa ki kor ki bor ba donkam, ka jingpynïeng ïa ki transformer bad kiwei de ki jingdonkam. Haba la pyndiaw pat mynta ïa ki nongshong shnong kane ka thain, katkum ka jingpynpaw u Sordar jong ka shnong Mawryngkneng, u Bah Peter J Lawai ula ong ba ïa kane ka project wat lada shu peit da ki riew paidbah la ïohi kumba ka la dep, hynrei haduh mynta ym pat pyntreikam ïa ka katkum ka jingthmu, watla ka jingpyntrei ka la ïaid mynta la 15 snem kynthih.
Kumta na ka liang ka Dorbar Shnong Mawryngkneng bad ki shnong ba marjan, ki la dawa na ka MEeCL, ba ka dei ban shimkhia mardor ïa kane ka kam bad ka dei ban pyndep noh ïa kane ka Power Sub Station la kumno kumno mynta ka snem 2024.
