Shillong, Jylliew: Ka National Youth Peoples Front (NYYF) mynta ka sngi ka la iakynduh ia u Symbud Myntri Rangbah ka jylla ban dawa na ka sorkar jylla ban thung da ka kynhun tohkit halor ka jingshah pynshitom u rangbah ha ki pulit jong ka Dawki Police Station.U President ka NYPF u Bah Kitboklang Nonglang ula ong, ba ka jingwan iakynduh ka jongki ia u Symbud Myntri Rangbah ka jylla u Bah Prestone Tynsong ka dei halor ka jingshah pynshitom uwei u riewrangbah na ka Pyrdiwah ha ki pulit jong ka Dawki Police Station ia kaba ka seng kam lah ban pdiang satia ia ka rukom shah pynshitom ka jong u. Ula ong ka NYPF ka sngewkhia ba ki briew kiba bat ia ka ain khamtam ki pulit kiba dei ban peit ia ka suk ka sain kiba dei ban iada ia ki nongshong shnong hynrei ki shim pynban ia ka aiñ ha ka kti da kaba shoh bad pynmynsaw namar ka jingpyrkhat sniew” ong u Bah Nongrem.
U President ka seng ula ong, ba ki la pynpaw sha u Symbud Myntri Rangbah ba kum kine ki jait jingjia kim dei shuh ban dang jia bad dei ban pynshitom ia kine kiba donkti ha ka kam bad la dawa ruh ban thung da ka kynhun tohkit (Inquiry) ban lap lut ia ki jingshisha.”Ynda la lap ia ka jingshisha nga ngeit skhem ba na ka liang jong ka tnad pulit kan pynshitom ia kine ki pulit kiba donkti ha ka ban pynshitom ia u rangbah” la ong u Nongialam ka NYPF.Katkum ka jingong u President ka seng na ka liang u Bah Prestone ula ai ka jingkular ba un shimkhia halor ka jingdawa bad ula bthah ruh ia u Superintendent of Police ka West Jaintia Hills ban pynlong ia ka jingtohkit bad ban leh da kaba tyngeh lada lap ba kila leh palat”.
“Kino kino kiba bat ka bor synshar bad ia ka bor jong ka aiñ ki dei ban leh beit katkum ka aiñ, ka jingjia kaba la jia mynin ha ka jaka ba kin tohkit bniah ia ka leit ka wan ka jong ki bad haba ka don kano kano ka jingleh bakla ne leh kano kano kaba be-aiñ, donkam ban pynshitom lyngba ka aiñ ym ban pynshitom bad pynmynsaw ia ka met kat haduh ban pyndait da u ksew ia u briew”,ula ong.Ula ong ba ki BSF ruh kim dei ban shim ia ka ain ha la ki jong ki kti, namar ba ka dei ka jingpynkhein ia ka hok longbriew manbriew. “Ngi pynrem jur ia kiba kum kita ha kano kano ka liang ruh bad kum ki samla ka NYPF ki kwah ia ka suk ka saiñ” ong u President ka NYPF.
