Dawa kyntiew kyrdan ka FKJGP ïa ka Nartiang PHC

Ka Federation of Khasi Jaintia and Garo People’s (FKJGP) hynne ka sngi kala dawa na ka Sorkar Jylla ban kyntiew kyrdan noh iaka Nartiang PHC kaba dei ka jaka ai jingsumar kaba la rim tam sha ka Sub District Hospital khnang ba ki paidbah kin ioh iaka jingsumar kaba bha bad kaba paka. Ki nongialam ka FKJGP hapoh ka jingialam u Vice President u Bah Kitboklang Nongphlang bad u President ka FKJGP Nartiang Unit u Bah Bin Raliang kila aiti da ka dorkhas ha ka Myntri Sorkar kaba khmih ia ka koit ka khiah ka Kong Ampareen Lyngdoh ban dawa ba dei ban kyntiew noh ia kane ka jaka ai jingsumar kaba la don naduh u snem 1950 sha ka Sub District Hospital.

U Bah Kitboklang Nongphlang ula ong, ka Nartiang PHC kadei kaba la don naduh u snem 1950 ha ka por ba ka jylla ka dang hap hapoh ka jylla Assam bad la tip ia ka kum ka State Dispensary hynrei ha u snem 2001 la ithuh noh iaka kum ka PHC kaba don 10 jingthiah. Ula ong ba ka long kaba donkam bha ban kyntiew kyrdan noh ia kane ka PHC namar ba ka ai jingshakri ia ki 36 tylli ki shnong bad palat 37295 ngut ki paid nongshong shnong khnang ba kin ioh ia ka jingsumar kaba paka.

U Bah Bin Raliang ula ong ba ka Myntri Sorkar kala ai ia ka jingkular ban shimkhia ia kane ka jingdawa bad kala bthah ia ka District Medical Health Officer (DMHO) ban leit jurip lang bad ka seng FKJGP bad ban aiti ia ka kaiphod, khnang ba kum ka myntri kan ioh leh ia kaba donkam na ka bynta ka bha ka miat jong ki paidbah.