U MLA ka North Shillong u bah Adelbert Nongrum mynta ka sngi ula ujor sha Meghalaya Lokayukta ban tohkit bad pynshitom ia kiba pyndonkam bakla ia ka Subhagya Skhim. Ia ka shithi jingujor u bah Adelbert ula aiti sha u Secretary ka Lokayukta u bah I.Rapthah. Haba kren sha ki lad pathai khubor, u bah Adelbert u la ong ba ka katkum ka kaiphod jong ka Controller Auditor General (CAG), 2023, ka sorkar pdeng ka la mang T.156 klur ia ka jylla na bynta ka Saubhagya skhim bad la jied ia ar tylli ki kompeni ban pyntreikam ia ka kam ha u 2018 jong ka sorkar barim. Katkum ka jingong u bah Adelbert, u Secretary ka sorkar India ha ka 14 tarik Nohprah,2018 ki la don ia ka jingialang lyngba ka Video Conferencing ba la shim bynta lang ryngkat u Chief Secretary ka sorkar jylla bad ki ophisar ka MEPDCL bad ha kane ka jingialang la mana ba ym dei ban iaid shakhmat ia ka kam.
Ula ong , “Na ka liang u Chief Secretary ka sorkar jylla bad ki ophisar ka MEPDCl ki la mynjur hynrei ki la pynkhein da kaba aiti sha ki ar tylli ki kompeni kynthup ka Satnam bad ka kompeni Onikon na bynta ban pyntreikam ia ka kam.”U bah Adelbert ula ong ba ia ka jingdkoh bad ka jingpyndonkam bakla ia kane ka skhim, la pynpaw ha ka kaiphod u CAG, kaba la wanrah ha ka iing Dorbar mynshem snem.U bah Adelbert ula ong ba ha Dorbar Mang tyngka ba dang shu dep, ula pyrshang ban wanrah ha iing Dorbar ia kane ka mat na bynta ban iatai namar kane ka ktah ia ka pisa u piadbah haba iadei bad ka Subhagya Skhim.“Kane kam dei shuh ka skhim hynrei ka ladei ka Subhagya Scam namar ba ki la pynsepei ia ka pisa,” ong u bah Adelbert.
Ula ong,“ Kum u MLA nga la pyrshang ban wanrah ha Iing Dorbar Thawain ka jylla, hynrei sngew phylla ba u Lamphang ka jylla um shym la shah ban iatai.”Ula ong ba ka jingthmu jong ka Lokayukta ka long ban weng ia ki kam bamsap hynrei ym tip la kane ka ophis kadei shisha ka ophis kaba laitluid.“Ngin peit ia kane ka Lokayukta haduh katno ka lah ban ai ia ka jingshakri ba hok ha kaba yn pynngat ia ki briew kiba don kti ha ki kam bamsap,”ong u MLA ka North Shillong. U MLA ka North Shillong u bah Adelbert ula ong ba ha kane ka jingujor ula ujor pyrshah ruh ia ki shiphew ngut ki ophisar.
