U Myntri Rangbah ka jylla u Conrad K. Sangma u la kyntu ia ki ophisar ka jylla, District bad Sub-Division ba kin iatreilang ryngkat ban pyntreikam pura ia ki prokram bad ia ki skhim bapher bad ula ban jur ban buh hakhmat eh ia ki paidbah ha man ki rai na bynta ki kam pynroi ban kyntiew ia ka jylla.
Ia kane ula kren ha ka jingialang ki Deputy Commissioner, Sub-Divisional Officer (Civil) ha nongbah Shillong hynne ka sngi Thohdieng ha ka jingdonlang u Myntri ka Sorkar Jylla u Bah Kyrmen Shylla, u Chief Secretary ka jylla u Bah DP Wahlang bad kiwei ki ophisar ka jylla.
U Myntri Rangbah ula ong, ka jingialang ka long ba donkam namar ki jingtip ba ngi la ioh na ki DC bad ki SDO ka long kaba kongsan na ka bynta ki paidbah baroh.
Ula ong ka thong jong ka jylla ka long ban kynjoh ia ka ioh ka kot sha ka ‘10 Billion US Dollar’ ba ia dei ruh bad ki 10 tylli ki mat jingkular jong ka sorkar bad ula ban jur ban don ka jingiatreilang ha baroh ki liang ban pynurlong ia kane ka thong.
Myntri rangbah ula pyntip ruh shaphang ki jingkdew bapher bapher ba ia dei bad ka jingkiew ka roi ka par ha kaba ka la kiew bha ha kine ki 6 snem ba la dep bad ka sorkar ka la lah ban leh bha ban pyntreikam ia ki skhim ka sorkar pdeng bad sorkar jylla bad ia kine la pyntreikam bha namar ka jingiatreilang, ka jingpeit bniah ia ka jingtrei bad ka jingkitkhlieh ryngkat ka jingai jingkhein ba khuid.
U la kyntu ia ki DC bad SDO ba ki dei ban leit jurip man la ka por ia ki skul, Hospital, PHC, CHC bad kiwei bad ban pyntip sha ka sorkar lyngba ki kor ki bor ba ai jingshakri khnang ba kane kan plie lad ia ki nongthaw polisi treikam ban ioh shim ia ki rai ba donkam.
Ka jingthmu jong ka jingialang ka long ban pyntip sha ki ophisar sorkar ia ki sienjam kiba la shim na ka bynta ban kyntiew ia ka rukom ai jingshakri ka sorkar jylla.
