Ka Union Public Service Commission (UPSC) ha ka 14 tarik Iaiong 2024 ka la pynbna ia ka Result eksamin UPSC hynrei napoh ka Jylla Meghalaya ym don uwei ruh pass ia kane ka eksam. Lah ban kdew ha u Jymmang 2023, u samla na Shillong u Swapnil Bhattacharya ula wanrah nam ia ka Jylla ba u la pass ia ka eksam Civil Service ba la pynlong ka UPSC bad ioh ia ka kyrdan 344 na baroh ki nongiakhun ia ka eksam hapoh ka Ri India. Haba pynpaw ka jingdiaw mynsiem ba khlem don ba Pass ia ka eksam UPSC napoh Meghalaya, u Myntri ka tnad Pule Puthi u Rakkam A Sangma ula ong, “Ka long kaba sngewsih ba ym shym don mano mano ruh na ki samla ka Jylla ki ban Pass ia kane ka eksam mynta u snem bad lehse ka lah ban don ka daw halor kane”.
U Rakkam ula ong, “Kane kan dei ka jingkyrsiew thiah ia ka Sorkar, ki jaka pule, ki stad kot bad ki samla ka Jylla namar ngi ngeit ba ki samla pule ka Jylla ki dei kiba stad bha hynrei kaei kaba long ba man ka dei kaba sngewkhia jur”. Ula bynrap ba lada ka Jylla kam lah ban pynmih ia ki Ophisar Civil Service, ka lawei kan long kaba dum bad ula iai ban ba ki samla ka Jylla kidei ban don ia ka mynsiem iakhun iaki eksamin bapher bapher.
Haba kylli kumta ka Sorkar kan shim iaki sienjam ban ai mynsiem iaki samla pule ban iakhun iaki eksamin, u Myntri ka tnat Pule ula ong “Ka daw lehse ka lah ban dei na ki Curriculum bad ka jingbha jong ki jaka pule ha Jylla bad ruh ka jingmut jingpyrkhat jong ki samla, ki bym iahap kyrdan bad kiwei pat ki Jylla hapoh ka Ri. “Ki jaka pule jong ngi kin hap ban khmih ba ki samla pule jong ngi kin ioh ia ki jinghikai kiba iakot bad ki National bad International Standard khnang ba kin lah ban pynkhreh bha ialade ha ka jingiakhun ia ki eksam. Kum ka Sorkar, ngi la pyrshang katba lah da kaba ai ia ki jinghikai ia ki samla ba kwah iakhun ia ki eksam Civil Service hynrei ngam sngewthuh hangno ba ngi don ka jingduna” ula ong.
