Ka Indian High Commission ha Dhaka bad saw ngut ki Assistant High Commission ki la iarap ia 1000 ngut ki samla pule na India ban wan phai sha India na ka jingjia iakulmar ha Bangladesh ha ki khyndiat sngi. Ka High Commission jong ka India ha Dhaka bad ki Assistant High Commission ha Chittagong, Rajshahi, Sylhet bad Khulna ki la ïarap ïa ki nong India ban wanphai sha la ïing hadien ki jingjia dang shen ha Bangladesh, ong ka kyrwoh. Ha ka jingïatreilang ryngkat ki bor synshar shnong, ki shim ïa ki lad ki lynti da ka High Commission bad ki Assistant High Commission ban iarap ka leit ka wan kaba shngaiñ sha ki jaka khappud ka India bad Bangladesh. Ka MEA ka ïatreilang ruh bad ki bor pyniaid liengsuiñ, kad liengsuiñ bad ki bor shipai BSF ban pynthikna ïa ka jingïaid lynti ba suk na ka bynta ki nongshong shnong jong ngi. Haduh mynta ki don 778 ngut ki samla pule na India ba la wan phai sha India lyngba ki kad liengsuin bapher bapher. Nalor kane, kumba 200 ngut ki samla pule ki la wanphai sha la ki ïing da ki liengsuiñ lyngba ki kad liengsuiñ ha Dhaka bad Chittagong. Ka High Commission jong ka ri India ha Dhaka bad ki Assistant High Commission ki ju iasyllok man ka por bad palat 4,000 ngut ki samla pule na India kiba dang sah ha ki skulbah bapher bapher ha Bangladesh, bad ki ai ruh ia ki jingiarap kiba donkam. La ïarap ruh ïa ki samla pule na Nepal bad Bhutan ban ïaid lyngba sha India katkum ka jingkyrpad, la bynrap ka kyrwoh.
Ka High Commission bad ki Assistant High Commission ki ju ïakynduh man ka por bad ki bor jong ka Bangladesh ban pynthikna ïa ka jingshngaiñ ki nong India bad ki samla pule. La pynbeit ruh ia ki bor pahara ha kaba donkam, na ka bynta ka jingleit jingwan ha surok ha ka por wan phai sha la ka ri lyngba ki kad liengsuin ba la buh. Ka High Commission ha Dhaka ka ïatreilang ruh bad ki bor pynïaid liengsuiñ paidbah jong ka Bangladesh bad ban pynthikna ïa ka jingshakri liengsuiñ khlem jingthut sha India na Dhaka bad Chittagong ban pyndonkam da ki trai ri ban wanphai sha la ïing la sem ha India.
Ka High Commission ka India ha Dhaka bad ki Assistant High Commission ka India ha Bangladesh ki don na ka bynta ban iarap ia ki nong India bad kiba donkam kyrkhieh ki lah phone ia number jong ka High Commission ka ri India, Dhaka +880-1937400591, Assistant high commission ha Chittagong+880-1814654797+880-1814654799, Assistant High Commission ha Rajshahi +880-1788148696, Assistant High Commission ha Sylhet, +880-1313076411 +880-1313076417, Assistant High Commission Khulna +880-1812817799.Ka Bangladesh ka la shah pynjulor bun ha kane ka jingiakhih pyrshah na ka bhah kam bad palat 60 ngut ki briew ki la ïap ha ka jingïakynad hapdeng ki bor pahara bad ki nongïakhih. Ki jaidbynriew na India ha Bangladesh ki don kumba 15,000 ngut, kynthup ia 8,500 ngut ki samla pule.
