Ka United Democratic Party (UDP) kala rai ba kan ym weng noh ialade na ka Sorkar synrop ka Meghalaya Democratic Alliance (MDA) ba ialam da ka National People’s Party (NPP). Kane ka wan hadien ki mih ki khubor, ba kala don ka jingiakren hapoh ka Party ban mih noh naka MDA ba ialam daka NPP daka ba kynnoh baka jingdon hapoh ka MDA kala nang pynhiar arsut iaka UDP.
Haba pynthikna ia kane u Working President ka UDP u Bah Paul Lyngdoh uba dei ruh u Myntri Sorkar ula ong “Ia ka rai baka UDP kan iai neh bad ka Sorkar synroplang ka MDA ba ialam daka NPP, la shim dang shen haka jingialang jong ka seng UDP”. U Bah Paul ula iathuh ba haka jingialang ka Party kala shong bishar bha ia ka jinglong jingman bad ka jingtreikam jong ka Party. Ula kam ba haka jingialang kala don ruh ka jingpynsngew kiba long pyrshah ban iai donlang haka Sorkar synroplang jong ka MDA hynrei ka sur kaba la mih khambun hi kadei ban dang dei ban neh beit haka sorkar MDA. “Kadei ka sur jong uba bun balang lem kumta kan sa don beit ka jingshim rai na ka bynta ban ia iaid noh ha la ka jong ka lynti, ia kaba kam shym la jia eiei.
Hynrei kala don pat ka jingpynpaw iaka jingbym lah ban lehbha ka seng bad ia kiwei kiwei ki daw kaba lam sha katei ka jingbym lah ban lehbha ha kaba ka VPP kala ioh ban lehkmen” ula ong. U Nongialam ka UDP ula ong ruh ba kam dei tang ka UDP kaba la rem ha baroh 12 tylli ki Seat hynrei jan baroh ki seng saiñ pyrthei kila rem ha man la ki 36 tylli ki constituency, ha kaba ka VPP kala lah ban wan nyngkong ha ki 34 tylli ki Constituency.
