Ka tnad pulit ka jylla mynta ka sngi ka la pyllong ia ka jingiathir na bynta kumno ban tehlakam ia ka kam shalan ia ki kynthei ha ki kam pynbrai. U Symbud Myntri rangbah ka jylla u bah Prestone Tynsong uba dei peit ia ka tnad kam pohiing ka jylla, ula ong ba kane ka kam ka dei kaba jia ha kylleng ka pyrthei bad ka la nangjur man ka sngi bad ka la long ka jingeh ha ka kylleng ka pyrthei. Ula ong ka jingpyllong ia kane ka jingiathir kan ai jingmyntoi shibun khnang ba ka sorkar kan ioh ia ka jingai jingmut halor kumno ban pynbha bad ban pynkhlain ia ki ain ban tehlakam ia kane ka kam. U Symbud Myntri rangbah ula ong, ba ka sorkar ka don ka jingthmu shisha ban pynduh ia kane ka kam runar kaba shyrkhei bad ula kyntu ia ki stad, ki riew shemphang ban ai ki jingai jingmut sha ka sorkar khnang ba leh ia kaba donkam.
U bah Prestone ula ai nuksa ba don ki kynhun kiba pyniaid beain ia ka kam khaii met bad lada ki pulit ki pynngat ia ki ha ka ain ka shem jingeh namar ba lada ki poi sha ka iing bishar, ki sakhi kim pat biang namarkata ban pynbeit ia kane ka jingeh donkam ban pynkhlain ia ka Ain la ka long ka Ain sorkar jylla ne ka ain sorkar pdeng. Ula bynrap hadien ka jingiathir iamir jingmut, ki pulit ki dei ban ai jingmut bad ka sorkar kan sa pyntikna ba kan shimkhia khnang ban pynsahngeh ia kine ki kam beain.
Ha shwa ia kane, ka Myntri ka tnad kam ain ka kong Ampareen Lyngdoh ka la ong ba ki kynthei bad ki shynrang ki dei ban iawan lang shakhmat ban ialeh pyrshah ia kane ka kam runar ba shyrkhei. Ka Myntri ka la ong, ba ka ain kam dei ban shu don kumta hynrei dei ban pyntikna ba ka ain kan treikam bad ai ia ka jingbishar ba hok. Ka la ong ba ki kynthei bad shynrang ki dei ban wan shakhmat ban iatreilang. Ha kane ka sngi, la ioh ruh ia ka jingkren na ka chairperson ka Women Commission ka kong Iamonlang Syiem kaba la ong ba ka kam shalan ia ki briew ha kane ka juk mynta ka dei ka jingeh jong ka pyrthei ha kaba ki briew kiba don bynta, ki la pyndonkam da ka tiar juk stad mynta, ha kaba ki shah ban pynbiej bun jait.
