Don kiba thmu pynjot ïa ka Sixth Schedule, ong u kyrtong ka RDA

U kyrtong MP ka Regional Democratic Alliance (RDA) u bah Robertjune Kharjahrin ula ong ba ka jingiasaid ki nongialam ban ioh ia ka Sixth Schedule, kaba la wanrah ia ka Autonomous District Council kaba dei ka jingkyrkhu ia ka jaitbynriew, hynrei don pat kiba thmu ban pynjot pynpra noh ia ka. U bah Robertjune haba kren ha ka jingialap elekshon ha iew Mawryngkneng, ula ong ba ki paidbah kim dei ban shongshit jied nongmihkhmat tang na ka jingsngewtynnad jingrwai hynrei kidei ban da pyrkhat ban puson bha. U la ong, “Ban iada ia ka jaitbynriew donkam ban iada da lai tylli ki ‘K’, kaba mut ka Khyndew, ka ktien bad ka kur ka jait. Kum ka jaitbynriew wat jied da kaba sngew thain, sngew balang, sngew niam hynrei jied ia u MP u ban iasaid ha Parliament”.

U la ong ba baroh ki kwah ia ka jingsynshar kaba khuid kaba suba hynrei ka jingkynnoh nongtuh, nonglute ia kiwei khlem ki sakhi satar, ka kham ma ban ia ka jingtuh jinglute. “Ngi ruh ngi kwah ia ka synshar khaddar kaba khuid, tangba la sngew khuid ialade bad hap ban kynnoh nonglute bamsap kat iaba lap ba shem khlem sakhi satar, ka jingkren ka la dei lypa ka jingbym khuid,” u la bynrap. U bah Robertjune u la ong ba lada ki paidbah ki jied ia u kum u MP nyngkong eh haba pyntreikam ia ki MP Skhim yn buh ia ki Independent Monitoring Team ha man ki District. “Ia kine ki Monitoring Team yn buh ym da ki briew sorkar hynrei yn buh da ki briew Shnong, ki briew Balang, ki sengbhalang bad da ki briew shimet na bynta ba kin peit bniah ia ka rukom pyntreikam ia ka MP skhim jong nga. Hangne phin sa iohi ia ka jingkhuid,” u la ong.  

U la ong ba ka RDA ka ieng halor ka nongrim ban pyntikna ba ki paidbah nongshong shnong kidei ban ioh ia ka hok ban mane Blei Laitluid, ban pyntreikam ia ka ILP, ban pynrung ia ka Ktien Khasi ha ka Sixth Schedule. Ha kajuh ka por u la kynthah ia u bah Vincent Pala halor ka jingtheh umpjah jong u ia ka ILP. “ Ar lai bnai shwa ka ilekshon, ngi iohi ba u bah Pala u kren ha Parliament tang kumba 40 second eiei halor ka ILP. Kane ka long ka jingsepei noh namar ngi ia ka ILP ngi la dawa naduh u 2019 hynrei kam shym la don ka jingbuddien na u,” la kynnoh u bah Robertjune. Ula kyntu ia ki paidbah ba lada kin ailad ia u ban long kum u MP, un bah bad un iasaid ia ki jingeh jong ka jaitbynriew ha Parliament.