Ka jingslem ki nonghikai SSA ha Meghalaya ban ioh ia ka tulop jong u bnai Naitung 2024 ka dei namar ba ki Nongtrei lane ki SSA Non-Teaching Staff ki dang don hapdeng ka jingiakhih. Ia kane la pyntip da u president ka Meghalaya SSA School Teachers Association (MSSASA) u Bah Aristotle Rymbai bad ula ong ba ki Non-Teaching Staff kim don hok ban pynduh ia ka tulop jong ki nonghikai. Haba kren sha ki lad pathai khubor u Bah Aristotle ula iathuh ba haka 6 tarik Nailar, ka MSSASA kala leit duh ia u State Project Director u Swapnil Tembe bad la iathuh ba ka jingslem ban pyllait iaka tulop kadei namar ka jingiai iakhih ki SSA Non-Teaching Staff. U Bah Aristotle ula kam baka Sorkar Jylla kala dep mang iaka tyngka ban siew tulop jong u bnai July iaki nonghikai SSA hynrei namar ba ki SSA Non-Teaching Staff ki dang don hapdeng ka jingiakhih, ka pisa haduh mynta kam shym la poi haki Bank Account.
“Ki Nongtrei lane ki SSA Non-Teaching Staff ki don iaka hok ban iakhih hynrei kim don pat ka hok ban pynduh iaka tulop jong ngi” kynthoh u Bah Aristotle.U Bah Aristotle ula ong baka Association kam don eiei ban kynthoh halor ka jingiakhih ki SSA Non-Teaching Staff hynrei ula kynnoh ruh ba kane ka jingiakhih kala pynduh iaka hok jong ki nonghikai. “Kane ka long kum kaei kaei kaba kila pynkhien iaka Provision jong ka Article 21 bad Article 300 (a) kaba la kren shai ba kino kino ki nongshong shnong ka Ri India kim don hok ban pynduh iaka tulop jong kiwei pat” ula ong.
U president ka MSSASA ula ong baka Association ka dawa naka Sorkar ban wad ki lad lynti ban pyllait iaka tulop jong u bnai July. Nalor kane ka MSSASA ka pynrem jur iaki katto katne ki briew kiba kam ialade ba kidei ki dkhot ka Association ban kam ba kam lei lei lada slem ka tulop kumba 1-2 bnai.
