U Myntri Rangbah ka Jylla u Conrad K Sangma u kyrpad ia baroh ki nongshong shnong ka Jylla ban iada bad pynneh iaki jaka lang um bad ki tyllong. U Conrad Sangma lem bad ophisar ka tnad PHE, Shillong Municipal Board, Meghalaya Satate Pollution Control Board, ula leit ban jurip iaka jaka lang um ha kawei ka khlaw ha Nongbah Shillong. Ula pynpaw ka jingsngewkhia ba kila tyrkhong ki wah duid kaba la buh ha ka jingeh ia ki paidbah ka jylla. “Baroh ngi tip ba ka Sor Shillong bad jan baroh ka Jylla ka don hapdeng ka jingtyrkhong um. Ki don bun ki daw bad kawei kadei namar ka jingkylla ka suinbneng bad ka mei mariang” ong u Conrad.
U Conrad ula ong, ba ki don bun ki lad bad ki sienjam ban shim na ka bynta ban pynduna ia ki jingeh ki paidbah namar ka jingtyrkhong um bad kawei ka sienjam kadei ban tyngkai ia ka um. “Kawei ka sienjam ba kongsan kadei ban iada bad pynneh iaki wah duid kiba don ha kylleng ki jaka jong ka Jylla daka ba pyllang iaka um ba don” la ong u Conrad. U Conrad ula ong ba ka long ka ba donkam ban tei da ki Dam rit (Check Dam) ban pynneh ia ki wah duid, ban pynneh ia ki wah duid da ka ba pyndonkam da ka juk stad ba mynta namar kane kan iarap ban pynkhie im biang ia ka jaka lang um kiba don ha ki khlaw ki btap.
“Nga kyntu ia ki paidbah ba nalor ki sienjam ba ka Sorkar ka shim, kadei ruh ka kamram jong baroh ban iada ia ki jaka lang um (Catchment Area), ki tyllong um da kaba kiar ban pynjot ia ki khlaw ki btap da kaba tih marpoh khyndew ha ki jaka ba lang um bad ki jaka ba don ki tyllong um” ula ong. Nalor kane u Conrad, u kyntu iaki paidbah ka Jylla ban tyngkai ia ka um, ban pyllang ia ka um slap (Rain Water Harvesting) ha man ki tyllong iing khnang ba kane ka pynduna ka jingtyrkhong um ha ki sngi bad ki snem ban wan.
