U Vice-Chancellor (VC) jong ka North Eastern Hill University (NEHU), Shillong u Prof Prabha Sankar Shukla dang shen ula leit ai jingkren ha ka jingialang kaba la pynlong da ka Association of Commonwealth Universities (ACU) ha ri Bilat.
Ha katei ka jingialang, u Prof Shukla ula kren bniah ha kaba iadei bad ka rukom treikam jong ka Artificial Intelligence (AI) ha ka ban mihkhmat bad ban iada ia ka Geographical Indications (GI) ha kaba ia dei bad ka ktien ka thylliej, Arts bad ka rep ka riang bad kumno ka AI ka long kongsan bha ban ai ka jingkyrshan ha ka ban iada ia ka kolshor kiba la don naduh ki por kiba mynshwa.
Ula ai ruh ia ka jingbatai ba ha kano ka rukom ka AI-Powered Solutions, kum ka Speech Recognition bad Natural Language Processing, ka lah ban thoh bad pynwandur ia ki recording jong ki ktien tynrai, kumta kala plie lad ha kaban pynkhie im biang lyngba ki educational apps bad e-dictionaries bad kitei ki kor teknoloji ki long kiba kongsan bha na ka bynta ban ai jinghikai ne ia ki ktien kiba la don ha ka jingma ban duhjait noh khnang ba ki pateng kiban dang wan kin nang ioh ia ki jingtip kiba bniah.
U Prof Shukla ula ong, ba ka AI ka lah ban buh ha ki jingthoh bad khmih bniah ia ki tiar ki tar kiba ia dei bad ka kolshor, ban thaw iaka thup jong kino kino ki jingshna ne jingtei kiba iadei bad ka kolshor tynrai, kaba kynthup ruh ia ki sur tem bad kiwei kiwei bad ula kren ruh halor ka Geographial Indication (GI) halor ka jaiñ muka na Assam, u sohsawdieng na Nagaland, u Sohniamtra Khasi na Meghalaya bad u Sohmynken Naga.
Ula kren ruh halor ka jingdonkam ban pyndonkam ia ka AI bad Blockchain Technology na ka bynta ban wad bad ban pynshisha ia kitei ki mar kiba la ioh iaka shap GI, ban pynthikna iaka jinglongtrai ka jongki, ban ioh ia ka iew ka hat kaba shaniah bad ban kyntiew iaka dor ka jong ki.
Ha katei ka jingialang u Prof Shukla ula banjur ruh ia ka jingkongsan ha kaban don ka jingiatreilang hapdeng ki skulbah kiba don hapoh jong ka ACU kiba kynthup ia ki 500 tylli ki jaka pule bad kumno kane ka jingiatrei kam lang kan plie lad ban leh ia ki jingwad bniah, ban kyntiew ia ka rukom pule, bad ban shimkhia ia ki jingeh kiba mad da ki ri bapher bapher halor ki mat bapher bapher.
