Ki kynhun ba don bynta ha ki kam jngohkai pyrthei hynnin ka sngi, ki la leit ai da ka dorkhas ia u Myntri Rangbah ka jylla bad dawa pynheh ia ka kad liengsuin Umroi, pynneh ia ka shongsuk bad ban buh ia ki Tourist Police ha ki jaka jngohkai ha jylla.
Ka Meghalaya Tourism Forum ryngkat bad ki kynhun bapher ha ki kam jngohkai ki pynpaw ka jingsngewkhia halor ka jingjia kaba la jia dang shen ha Umtyngar ia kaba ki nongjngohkai ki la shah pynsangeh ha kawei ka sengbhalang bad la phah leit phai noh ia ki bad kane ka jingjia ka la ktah ia ka kam jngohkai bad ka kamai kajih ki paidbah ha jylla.
Haba iakren bad ki nongthoh khubor u Bah Allan West ula ong, ka kynhun ka pynrem jur ia katei ka jingjia ban khanglad ia ki nongwan shangkai ha ka jylla bad kyntu ia ka sorkar jylla ban shimkhia namar ba ka la pyntieng ia ki paidbah ban wan kai hapoh ka jylla.
“Ka dei ka kamram ka sorkar jylla ban pynthikna ka jingshngain ia ki nongwan jngohkai haba ki rung bad leit ha kylleng ki jaka ka jylla Meghalaya. Ngi kiba don bynta ha ki kam jngohkai, ngi donkam tang ia kawei, kata ka long ka shongsuk bad ka dei ka kamram ka sorkar ban pynthikna ia ka shongsuk khnang ba ka kam jngohkai kan nangkiew ha ka jylla” ong u Bah Allan West.
Ula iathuh ki la ai jingmut ia ka sorkar jylla ban peitngor ia ka jinglong jingman bad ka leit ka wan ki nongjngohkai bad ki kyntu ia ka sorkar ban pynheh ia ka Kad liengsuin ha Umroi namar ka jingeh ka jylla haduh mynta ka long ka dang shaniah ia ka kad liengsuin ha Guwahati.
Ula bynrap lada ka sorkar jylla, sorkar pdeng bad ka Airport Authority of India ki iatreilang ki liengsuin ba heh ki lah ban hiar ha kad liengsuin Umroi bad ym dei tang ki liengsuin na ka Kolkatta hynrei na kiwei ki nongbah kum ka Chennai, Mumbai, Bangalore bad Delhi.
“Lada lah ban pynheh ia katei kad liengsuin kumba 80% ki jingeh ha ka leit ka wan ki briew na shabar jylla kan duna” ong u Bah Allan ula bynrap ki la ai jingmut ia ka sorkar ban buh ki bor pahara ha ki jaka jngohkai ba la ithuh kum ha Sohra, Dawki bad Amlarem.
U Bah Allan ula ong, ki la ai jingmut ban buh da ki Tourist Police haba yn don bynta lang ki samla na ki shnong bad ki Village Defence Party, hynrei ki samla ba la shah jied kum ki Tourist Police ki dei ban long kiba tbit ha ka kam kumba long ki Tourist Police ha ka Ri Thailand bad Singapore.
